Улууспут хаһыата “Эҥсиэли” бүгүн, алтынньы 5 күнүгэр, тэриллибитэ оруобуна 90 сыла буолар. Бу сыллар усталарыгар төһөлөөх элбэх олох чахчытын кэрэһэлиир ыстатыйа бэчээттэммитэ буолуой… Сүҥкэн суолталаах суруйуулар бириэмэ аастаҕын аайы ордук сыаналанан иһэллэр, ол эбэтэр архыып докумуонун курдук, ааспыт историяны туоһулуур кыахтаахтар.
Бэчээккэ тахсыбыт матырыйааллары кинигэ тахсыытыгар туһанааччы элбэх. Ааспыт кэмҥэ олорон ааспыт дьоммут-сэргэбит туһунан хаһыаппыт балаһаларыттан булабыт. Холобура, хамаҕатталар Кыайыы 75 сылын көрсө “Ленин холкуос кыайыыга кылаата” кинигэбитигэр сэрии кыттыылаахтарын туһунан 29 автор суруйууларын, ол иһигэр Александр Дунаев, Макар Жирков, Егор Иванов, хаһыат журналистара И. Васильев, В. Еремеев хастыы да ыстатыйаларын булан кинигэҕэ киллэрбиппит. Маны тэҥэ тыыл бэтэрээннэрин сырдатар ахтыылар эмиэ үгүс этилэр.
Хас биирдии хаһыакка сурутааччы бэйэтэ кэрэхсиирин булан үөрэрэ үгүс буолуохтаах. Ол тэҥэ мин ыанньыксыт ийэм аатын, хаартыскатын хаһыат саһарбыт страницаларыттан “Ленин” холкуоска, “Нам” сопхуоска үлэлээбит чахчылаах түгэннэрин булаттаабытым. Ол курдук, оччотооҕу биллэр корреспондент В. Еремеев “Тыа хаһаайыстыбатын туйгуннара” диэн бэлиэтээһинигэр производственнай управление начальнига М.И. Терютин “РСФСР тыатын хаһаайыстыбатын социалистическай куоталаһыытын туйгуна” бэлиэни 23 чулуулар түөстэригэр иилбитин туһунан баар, ол иһигэр ийэм Ульяна Винокурова ааттаммыт.
Аны биир “Бастыҥнар слеттара” ыстатыйаҕа ийэм кыһыл көмүс хары чаһытынан бириэмийэлэммитин туһунан баар. Ити хаһыакка суруллубут түөскэ анньыллар бэлиэтин, сибидиэтэлистибэтин харыстаан уура сылдьабыт. Оттон хары чаһыта дьиэ кэргэн ытык мала буолар. Сэбиэскэй саҕанааҕы “Заря” чаһы билигин да үлэлиир, браслета быстыбытын уларытан, маанылаан кэтэбин. Ийэм “Колхоз сирдьитин”, “Ленин суолун” көтүппэккэ сурутан ааҕара. Ыанньыксыт ийэм бу сылга төрөөбүтэ 100 сыла…
Улууспут хаһыата күннээҕи олохпутун сырдатан. күнтэн күн саҥаны-сонуну тиэрдэн, барыбытын түмэр, биир тыынныыр аналлаах!
Мария Винокурова