Киэн туттар биир дойдулаахпыт, саха талааннаах композитора Захар Порфирьевич Винокуров аатын сүгэр Намнааҕы оҕо искусствотын оскуолата тэриллибитэ быйыл 65 сылын туолла.
Сыл устата былааннаммыт тэрээһиннэр быыстала суох ыытылыннылар. Үбүлүөйдээх тэрээһин М.К. Аммосов аатынан культура уонна духуобунай сайдыы дыбарыаһыгар сэтинньи 20 күнүгэр үрдүк таһымҥа ыытылынна.
Сарсыардатын Дьокуускай куоракка Ю.А. Гагарин аатынан культура киинигэр «Вдохновение» диэн Намнааҕы оҕо искусствотын оскуолатын художественнай салаа үөрэнээччилэрин уонна уһуйааччыларын быыстапката тэрилиннэ. Быыстапканы ахсынньы 3 күнүгэр диэри тиийэн көрүөххүтүн сөп.
Күн иккис аҥарыгар дыбарыаска араас сылларга үлэлээбит-хамнаабыт, айбыт-туппут уһуйааччылар, оскуоланы бүтэрбит выпускниктар муһуннулар. Тэрээһин оҕо искусствотын оскуолатын коллективын хорунан саҕаланна. Элбэх эҕэрдэ тыла этилиннэ, искусство үрдүк чыпчаалын дабайбыт выпускниктар, оҕолор ырыа ыллаан, инструмеҥҥа оонньоон, үҥкүүлээн дьоро күнү киэргэттилэр.
Бастаан сыанаҕа оскуоланы төрүттээбит, бастакы директорынан үлэлээбит Иван Бубякин уонна билигин ситиһиилээхтик директордыы сылдьар Алексей Афанасьев тахсан эҕэрдэлэрин эттилэр. Салгыы Ил Түмэн спикерэ Алексей Еремеев эҕэрдэтин аахтылар. Ол кэнниттэн улуус баһылыгын социальнай боппуруостарга солбуйааччы Юрий Дьяконов, улуус депутаттарын сэбиэтин председателэ Алексей Винокуров, улуустааҕы культура уонна духуобунай сайдыы салалтатын салайааччыта Семен Ядрихинский, нэһилиэктэр баһылыктара о.д.а. эҕэрдэлэрин этэн туран, оскуола сайдыытыгар кылааттарын киллэрэ сылдьар үлэһиттэргэ наҕараадалары туттардылар.
Намнааҕы оҕо искусствотын оскуолата 4 филиаллаах уонна 3 нэһилиэккэ фортепиано, уруһуй уонна үҥкүү кылаастардаах, уопсайа 745 үөрэнээччилээх. Бу оскуолаҕа үөрэммит оҕо ырыа-үҥкүү, уруһуй абылаҥар, музыкальнай инструмент алыбар ылларан, олоҕун тухары искусство кэрэ эйгэтигэр эттиин-хаанныын сыстар. Араас сылларга бүтэрбит выпускниктар үөрэппит-такайбыт уһуйааччыларыгар истиҥ махталларын анаатылар, сэмэй бэлэхтэрин туттардылар. Оскуолаҕа сылдьан үөрэммиттэрэ билигин даҕаны олохторугар туһалыырын бигэргэтэн эттилэр.
Бу оскуоланы бүтэрэн үтүө үлэһит, биллиилээх артыыс буолбут дьоммут үгүстэр. Олортон бу күн СР норуотун артыыһа Анегина Дьяконова уонна Г. Кривошапко аатынан СР Государственнай филармониятын солиһа Петр Попов оскуола уһуйааччыларын, выпускниктарын оркестрын доҕуһуолунан ырыаларын бэлэх ууннулар.
Бу курдук, улууспут биир бастыҥ оҕо искусствотын оскуолатын төрүттэммитэ 65 сылын үөрүүлээх быһыыга-майгыга үрдүк таһымҥа бэлиэтээтэ. Хас биирдии тыл эппит киһи аныгыс үбүлүөй оскуола саҥа дьиэтигэр бэлиэтэнэрэ буоллар диэн баҕа санааларын эттилэр.
З.П. Винокуров аатынан Намнааҕы оҕо искусствотын оскуолатын коллективыгар, үөрэнээччилэригэр, ытыктабыллаах ветераннарыгар итии-истиҥ эҕэрдэбитин тиэрдэбит! Айымньылаах үлэҕит ситиһиилээх буоллун, дьоллоох-соргулаах буолуҥ!
Анна Созонова, «Нам улууһа» пресс-сулууспата