Алтынньы 16 күнүгэр М.К. Аммосов аатынан культура уонна духуобунай сайдыы Дыбарыаһыгар анал байыаннай дьайыыга сылдьар биир дойдулаахтарбытыгар көмөлөһөр сыаллаах киэҥ ыҥырыылаах, үгэскэ кубулуйбут, «Биир санаанан — биир сомоҕо!» акция ыытылынна.
Икки күн устата барыта 5 мөл. 253 043 солк. киирбитин туһунан улуус дьаһалтата иһитиннэрдэ. Маны тэҥэ таҥас-сап, эмп-томп, ас-үөл, хаххаланар сиэккэ, харысхаллар, оҕолор уруһуйдара, суруктара, аккырыыккалара хомулунна. Баһыылканы, үбү-харчыны түмэн сэтинньи саҥатыгар улууспут делегацията биир дойдулаах байыастарыбытыгар илдьэн туттарыаҕа.
Төрөөбүт дойдуларыттан көмөнү саллаат уолаттарбыт хайдах курдук кэтэһэллэрин-күүтэлллэрин, туттахтарына үөрэллэрин, долгуйалларын туһунан акцияҕа кыттыбыт тэрилтэ салайааччылара, нэһилиэк баһылыктара тоһоҕолоон бэлиэтээтилэр.
«Воин» түмсүү салайааччыта Павел Оконешников:
— Нам улууһун делегацията хомуллубут көмөнү тиэрдэ ахсыс төгүлүн сотору байыастарбытыгар айанныахпыт. Көмө уолаттарга тиийиэҕэ диэн бүк эрэллээхпит. Байыастар номнуо истиһэннэр, эрийэн ыйыталаһаллар, хаһан кэлэҕит, кимнээх кэлэллэрий диэн сураһан кэтэһэ сылдьаллар. Бу көмө кинилэргэ улахан кыах биэрэр. Онон бйыастар ааттарыттан махталбын тириэрдэбин! Байыаннай дьайыы түргэнник бүтэн, уолаттарбыт этэҥҥэ эргиллэн кэлэллэрин баҕарабыт. Байыастарбыт окуопаҕа, блиндажка сытан олус сылайдылар. Көмөнү эрэйэллэр, кэтэһэллэр. Ыарахан кэмнэргэ бары түмсэммит күүс-көмө буоларбыт олус кэрэхсэбиллээх. «Буойун» түмсүү, байыастарбыт ааттарыттан барыгытыгар улахан махталбытын тиэрдэбит.
Иван Ноговицын, Хатыҥ Арыы нэһилиэгин баһылыга:
— Биһиги улууспут, уопсайынан, Сахабыт сирэ олус үчүгэй көрдөрүүлээх – СВО-ҕа сылдьар уолаттарга көмө чааһыгар. Өрөспүүбүлүкэбит улахан көмөнү оҥорор регион быһыытынан биллэр. Байыастары кытта кэпсэттэххэ, саха уолаттарыгар ымсыыралларын, түмсүүлээхпитин, бэлиэтииллэр – хамандыырдара кытта. Сахабыт сиригэр биир саамай түмсүүлээх, күүскэ көмөлөһөр, уолаттарын көрөр-истэр улууһунан Нам улууһа буолар. Улууспут салалтата, «Буойун» түмсүү, военкомат буолан бииргэ табыллан үлэлээннэр улахан көмө биһигиттэн бара турар. Биллэн турар, ыарахан. Байыаннай дьайыыга сылдьаччыларга өссө уустугун бары өйдүөх тустаахпыт. Онон дьйыы бүтүөр диэри акция тохтуо суохтаах, маннык ыытылла туруохтаах. Хатыҥ Арыы нэһилиэгэ сыллата мөлүйүөн аҥаара кэриҥэ үбү-харчыны мэлдьи оҥорор.
Андрей Новгородов, Искра нэһилиэгин баһылыга:
— Акция түмүгүнэн барыта 52 тыһ.тахса солк. хомулунна. Нэһилиэктэн төрүттээх 15 ыччат байыаннай дьайыы саҕаланыаҕыттан дойдуларын чиэстээхтик көмүскүү сылдьаллар. Хомойуох иһин, 3 байыас дьайыы хонуутугар хорсуннук охтубуттара. Көмө акция суолтата олус улахан. Улууспут делегацията сылга иккитэ байыастарбытын көрсөрө, көмөнү тиэрдэрэ хайҕаллаах.
Ефим Гоголев, Модут нэһилиэгин баһылыга:
— Модут олохтоохторуттан 189 тыһ. тахса солк. киирдэ. Биир тэрилтэбит 20 тыһ. солк. уу харчынан ууран биэрдэ. Түгэнинэн туһанан мин кинилэргэ махталбын тиэрдэбин. Маннык акция булгуччу буолуохтаах. Ким да көмөттөн туора туруо суохтаах. Уолаттарбыт барахсаттар онно тоҥо-хата, эрэйи көрө сылдьаллар. Онон саатар биир күннээх хамнаспытын биэрэрбит булгуччуулаах дии саныыбын. Биир фиксированнай ставканан хомуйуохха диир дьоннор бааллар. Мин оннук кэпсэтэр дьону олох сөбүлээбэппин. Ол-бу биричиинэни көрдөөн фиксированнай ставканы ылынар эҥин диэн өйдөбүл суох буолуохтаах. Мин дьоммор-сэргэбэр өйдөтөн, көмө булгуччулааҕын туһунан кэпсии, тиэрдэ сатыыбын. Намҥа олорор атын улуус дьоно биир дойдулаах саллааттарыгар, аймах байыастарыгар көмө ыыталлар. Ону биһиги кинилэргэ тиэрдэбит. Онон биһиги элбэх, киэҥ үлэни оҥоро сылдьар акциялаах улуус буолабыт. Модуттан 12 уол сулууспалыы сылдьар. Сибээспитин тутабыт.
Василий Жирков, Хомустаах Бастакы нэһилиэгин баһылыга:
— Нэһилиэкпит дьонунан барыта 350-тан тахса тыһ. солк. хомулунна. Көмө акцияҕа мэлдьи көхөтөөхтүк кыттабыт. Байыаннай дьайыы кыттыылааҕын 23 ыала биһиэхэ олорор. Хомойуох иһин, уонтан тахса уолбут дьайыы хонуутугар хорсуннук оҕуннулар. Кинилэр дьиэ кэргэттэригэр өрүү көмөлөһөбүт.
Биһиги дьоҕус редакциябыт көмө акцияттан эмиэ туора турбат, сэмэй кылааппытын мэлдьи киллэрэбит. Биир идэлээхпит, редакция анал корреспондена «Журналист» диэн позывной ылынан байыаннай дьайыы хонуутугар сулууспалаабыта үһүс сылыгар барда. Сылга иккитэ ыытыллар көмө акцияҕа булгуччу харчы хомуйан туттарабыт. Итиэннэ хамнаспытыттан, дьоҕус да буоллар, биир сууманы ый аайы көмөҕө ыыта олоробут. Биһиги сэмэй да буоллар кылааппыт кыайыыны чугаһатыаҕа диэн эрэнэбит.
Лена Ноговицына