Көбөкөн нэһилиэгин олохтоохторо «Биир санаанан — биир сомоҕо!» акцияҕа кыттыһаллар. Бу туһунан “Көбөкөн нэһилиэгэ” тыа сирин түөлбэтэ телеграм-ханаалыгар суруйар.
Ол курдук, кэлэр ыйга Нам делегацията Ийэ дойдуларын көмүскүү, байыаннай дьайыыга кытта сылдьар хорсун хоодуот уолаттарбытыгар айанныаҕа.
Уолаттарга таҥас-сап, дойдуларын сибиэһэй аһын илдьэ баралларыгар Көбөкөн нэһилиэгин кэрэ аҥардара сибиэһэй собо, минньигэс бэрэски, барыанньалары уонна араас туттар маллары-саптары бэлэмнээтилэр. Хас биирдии аһы вакуумнаан, суруктаан-бичиктээн, алгыс тыллары анаан ис сүрэхтэн кыһаллан астаатылар. Бары биир санаанан, биир сомоҕо буолан кыайыы, эйэлээх олох иһин туруулаһабыт!
***
Алтынньы 23 күнүгэр Көбөкөн нэһилиэгин ыччата муус ылан тиэйдэ.
-Байыаннай дьайыы кыттыылаахтарыгар, кинилэр төрөппүттэригэр, дьиэ кэргэттэригэр анаан, тыыл бэтэрээннэригэр, сэрии сылын оҕолоругар, соҕотох аҕам саастаах дьоммутугар төрөппүттэригэр муус ыллыбыт. Күүс-көмө буолбут ыччаппытыгар Көбөкөн нэһилиэгин дьаһалтатын аатыттан улахан махталбытын тиэрдэбит. Тус олоххутугар, дьиэ кэргэҥҥитигэр чэгиэн-чэбдик доруобуйаны!»- диэн Көбөкөн баһылыга Илларион Пестерев санаатын үллэстэр.
Хаартыскалар: “Көбөкөн нэһилиэгэ” тыа сирин түөлбэтэ ТГ канаала