Ийэ – киһиэхэ күндүттэн күндү тыл. Учуутал – билиини тиэрдээччи, саҥа олоххо үктэли олохтооччу … Өссө да үгүс үтүө тылы этиэххэ сөп.
Нам улууһугар Үөрэҕирии 155 сылыгар Е.М.Шапошников аатынан Хамаҕатта орто оскуолатын аҕа көлүөнэ учуутала А.И. Атласова 100 сааһыгар анаммыт саҥа кинигэни кыра кыыһа Людмила Григорьева бэчээттэтэн, презентация тэрийдэ.
Александра Ионовна үгүс көлүөнэ ыччаты улуу нуучча тылыгар уһуйан ииппитэ, үөрэппитэ. Кинигэҕэ кинилиин бииргэ үлэлээбит биир идэлээхтэрин, үөрэнээччилэрин, доҕотторун, аймахтарын ахтыылара уонна суруйбут үлэлэриттэн ыстатыйалар киирбиттэр. Кинигэ ис хоһоонун хаартыскалар ситэрэн, чочуйан биэрэллэр. Сыһыарыыга Александра Ионовна төрүччүтэ көрдөрүллүбүт.
Кинигэ киһи духовнай баайын сыаналыыр, биһиги аттыбытыгар үлэлээн-хамнаан, бэйэлэрин суолларын-иистэрин хаалларан барбыт дьоннорун өйдүүр, билинэр ааҕааччыга туһуланар диэн Людмила Ивановна бэлиэтиир.
Людмила Ивановна ийэтигэр анаабыт бу иккис кинигэтэ. Бастакы «Саргылаах санааларым» диэн кинигэни 2024 с бэчээттэппитэ.
Яна Петрова