Бүгүн Дьокуускайга, аһаҕас халлаан анныгар, Өрөспүүбүлүкэ болуоссатыгар, ыал буолуу үөрүүлээх сиэрэ-туома ыытылынна.
Бу саҥардыллыбыт болуоссакка ыал буолуу бастакы сиэрин толоруу биһиги биир дойдулаахпыт, Бөтүҥтэн төрүттээх Борис Трофимовка, кийиит кыыспыт Василина Шахурдинаҕа оҥоһулунна. Бу уруккута Ленин аат. болуоссат РФ президенин укааһынан бигэргэммит маастар-былаанынан элбэх өҥөлөөх общественнай эйгэ быһыытынан саҥардыллан тутуллубута.
Эдэрдэр бу саас муус устар 27 күнүгэр, Өрөспүүбүлүкэ күнүн бырааһынньыгын кэмигэр ыытыллыбыт СӨ Ил Дархана Айсен Николаев быһа эфирин кэмигэр, Өрөспүүбүлүкэ болуоссатыттан быһа холбонон, ыал буолар сиэрдэрин-туомнарын болуоссакка ыытарга санаммыттарын, үөрүүлээх түгэҥҥэ Айсен Сергеевиһы ыҥыралларын туһунан эппиттэрэ. Олох умнуллубат үөрүүлээх түгэнигэр ыҥырыы Ил Дарханы соһуппута да, үөрдүбүтэ да. Өссө хаһан да маннык быһа эфиринэн Айсен Сергеевич сыбаайбаҕа ыҥырыы тута илигэ. Ил Дархан эдэрдэргэ махтаммыта, саамай истиҥ баҕа санаатын тиэрдибитэ. Итиэннэ билигин Дьокуускайга хас да сиргэ ыал буолуу сиэрин-туомун толоруохха сөбүн, ЗАГС дьиэтигэр эрэ буолбакка, пааркаҕа, саҥардыллыбыт Өрөспүүбүлүкэ болуоссакка, култуура, сынньалаҥ пааркатыгар, маны таһынан, «Өлүөнэ очуостара» национальнай пааркаҕа эмиэ оҥоруохха сөп диэбитэ.
Быһа эфир кэмигэр ыҥырыыны тутан, СӨ Ил Дархана Айсен Николаев бүгүн эдэрдэри эҕэрдэлии, үөрүүлэрин үллэстэ кэллэ.
Борис Трофимов 2009 с. Е.С. Сивцев — Таллан Бүрэ аат. орто оскуоланы бүтэрбитэ. Лукина Людмила Николаевнаҕа, Маркова Галина Прокопьевнаҕа, Галина Егоровна Оконешниковаҕа уо.д.а үөрэммитэ. Оскуола кэнниттэн, ол саҕана өссө ЯГУ, ГРФ-гар киирбитэ. 2014 ХИФУ — ну бүтэрэн хайа инженерэ идэни баһылаабыта.
Билигин «Сургутнефтегаз» тэрилтэҕэ Талакааҥҥа идэтинэн үлэлиир.
Бэйэ информ.
Хаартыска Улусмедиа