В.П. Артамонов аатынан Хамаҕатта саха-француз лицей иитэр үлэтин биир
сүрүн хайысхатынан “Эдэр патриот” программа буолар. Бу оскуола иһинээҕи
бырайыагы 2004 сыллаахха оччолорго дириэктэри иитэр үлэҕэ солбуйааччы
Юрчана Юрьевна Парникова саҕалаабыта. Онтон ыла сыл аайы тиһигин
быспакка кылаастар кыраайы үөрэтэр тиэмэҕэ ирдиир-чинчийэр үлэни
ыыталлар.
Быйылгы үөрэх сылыгар Улуу Кыайыы 80 сылынан “Дьиэ кэргэн фроннааҕы
альбомун” хас биирдии үөрэнээччи оҥордо. Бу дириҥ суолталаах үлэлэрин
муус устар 17 күнүгэр көмүскээтилэр. Кылаас барыта 1 кылаастан 11-тэргэ
диэри бэлэмнээбит матырыйаалларын экраҥҥа көрдөрөн, быһааран
билиһиннэрдилэр, уопсай оҥорбут альбомнарын лицей музейыгар
туттардылар. Бу тэрээһини 10 “б” кылаас үөрэнээччилэрэ Лиза Сивцева,
Сайаан Кононов салайан ыыттылар.
Оҕолор хос эһэлэрин бойобуой суолларын, хос эбэлэрин тыылга үлэлэрин
түмпүт тус альбомнарын дьиэ кэргэн реликвията оҥостон дьиэтээҕи
архыыптарыгар харайалларыгар диэн үлэ барбыт. Манна кылаас
салайааччылара, төрөппүттэр, үөрэнээччилэр “Ким да умнуллубат, туох да
умнуллубат!” девиһинэн биир ситимнээх үлэ ыыппыттара көһүннэ.
Үүнэр көлүөнэ төрөөбүт дойдутун историятын, олохтоох дьонун-сэргэтин
билэригэр, ытыктыы улаатарыгар туһаайыллыбыт “Эдэр патриот” бырайыак
дириэктэри иитэр үлэҕэ солбуйааччы Светлана Софроновна Новгородова,
музей салайааччыта Антонина Даниловна Евсеева тэрийиилэринэн сыллааҕы
үлэтин түмүктээтэ.
Мария Винокурова