Хаарчаана сүрэҕэ Хатыҥ Арыы олохтоохторун сөхтөрдө

Аппааны бөһүөлэгэр «Чороон» норуот айымньытын киинигэр Ангелина Данилова остуоруйатыгар олоҕуран саҥа дьыллааҕы «Хаарчаана сүрэҕэ» театрализованнай көстүү толору көрөөччүлээх үрдүк таһымнаахтык буолан ааспыта.

Театрализованнай көстүү режиссерун Горьяна Стрекаловскаяны кытта көрсөн сиһилии кэпсэттим. Горьяна Максимовна «Чороон» норуот айымньытын киинигэр 2019 сылтан режиссерунан үлэлиир, Аппааныга кийиит, кэргэнэ Стрекаловскай Янис Иванович ИДьУО сотруднига, икки кыыс, биир уол оҕолоох эдэр ыаллар. Режиссер идэлээх буолан Горьяна саҥа сылга олохтоохторго саҥа дьыллааҕы остуоруйа киэһэтин бэлэхтииригэр санаммыт. Хайдах остуоруйаны талан туруорбутун туһунан маннык кэпсиир:

«Ангелина Данилова «Хаарчаана сүрэҕэ» остуоруйатыгар олоҕуран суруллубут сценарий буолар элбэх остуоруйаны аахпытым уонна бу саамай сөбүлээбиппин талбытым. Сүрүн оруоллары талар наһаа уустуга суох этэ, тоҕо диэтэххэ бииргэ үлэлиир коллегаларым уонна куруук биһиэхэ кыттыыны ылар дьоммут бары да талааннаах, сатаан артыыстыыр дьон. Чэ, арай Хаарчаананы саамай өр толкуйдаабытым. Бэйэм оонньуохпун олох баҕарбатаҕым. Бу сырыыга режиссер быһыытынан үлэлиибин диэн былааннаммытым. Аинаны  санаабытым эрээри, үлэтэ да ыараханынан баҕар сөбүлэһиэ суоҕа дии санаабытым. Онтон чэ, ыйытан көрүөххэ диэн ыйытааппын кытта кыыһым үөрэ-көтө сөбүлэспитэ. Билигин олох Аинаттан ураты бу оруолга кими да көрбөппүн. Варябынаан хайдах үҥкүүлэр туруохтарын сөбүн быһаарсыбыппыт. Онтон ырыа ансаамбылларын ханан киллэриэххэ сөбүн, туох оруоллаах буолалларын толкуйдаан баран, репертуардарын Саргылаана Даниловналыын, Ариан Ивановичтыын талбыппыт. Анжеликабынаан «Сыдьаайа»-ларга ханнык үҥкүү барсарын тута өйдөһөн түргэнник толкуйдуу охсубуппут. Остуоруйа сюжетыгар ырыа үҥкүү коллективтары, Эриэн үөн персонаһы, кыра, орто, улахан Тымныычаан уолаттары эбэн, уларытан, бэйэбит дьоммутугар барсар гына театрализованнай көстүү буолан таҕыста. Ол курдук кулууппутугар баар улахан коллективтар бары кыттыыны ыллылар».

Саҥа 2025 сылы көрсө ахсынньы 30 күнүгэр “Хаарчаана сүрэҕэ” тетрализованнай көстүүнү нэһилиэк, улуус олохтоохторо сөҕө-махтыйа көрбүттэрэ. Бу күн ыҥырыылаах ыалдьытынан СӨ култууратын уонна духуобунай сайдыытын миниистрэ Афанасий Иванович Ноев кэлэн эҕэрдэлээн, сэмэй бэлэҕин Хаарчаана оруолун толорбут Аина Винокуроваҕа уонна туруорааччы режиссерга Горьяна Стрекаловскаяҕа туттарбыта. Нам улууһа муниципальнай тэриллии баһылыга Юрий Слепцов, Хатыҥ-Арыы нэһилиэк муниципальнай тэриллии баһылыга Иван Ноговицын нэһилиэк дьонун уонна ыалдьыттарын кэлэн иһэр саҥа дьылынан эҕэрдэлээбиттэрэ. Үгүс көрөөччү көрдөһүүтүнэн тохсунньу 14 күнүгэр толору саалаҕа мустубут көрөөччүлэргэ анаан остуоруйаны хатылаан көрдөрбүттэрэ.

Театрализованнай көстүүгэ оруоллары толордулар. Кэпсээнньит – Марианна Рожина, истээччи уоллаах кыыс оруолун – «Айар аартык» театральнай студия артыыстара Намина Стрекаловская, Мирослав Максимов. Сайын Куо Галина Семенова, Тымныычаан уол Айхал Винокуров, Эрхан Гаврильев, Степан Суздалов. Улуутуйар Муус Тойон Андрей Слепцов, Далбар Хотун Күһүнчээнэ – Нюргуяна Адамова, кэлэр сыл бэлиэтэ Эриэн үөн Петр Машников, Симэхсин эмээхсин Марианна Винокурова уонна сүрүн Хаарчаана оруолун – Аина Винокурова.

Сүрүн оруоллар таҥастарын тиктилэр, киэргэттилэр «Чороон» НАК үлэһиттэрэ Айталина Уваровская, Анастасия Доромонова, Олимпия Кириллина. Уотунан киэргэттэ Виталий Евсеев. Экраҥҥа киэргэтиини оҥордо Гаврил Макаров. Музыканан киэргэттэ Ариан Васильев. Реквизиттары оҥордо Петр Машников. Салайааччы Саргылаана Пономарева. Бары оруолларга сөп түбэһиннэрэн аныгы ньымалары уот-күөс, видеокиинэ туһанан остуоруйа ис хоһоонун чаҕылхайдык көрдөрдүлэр уонна нэһилиэкпит олохтоохторо талааннаахтарын, оруолларын итэҕэллээхтик оонньоон, хас биирдии көрөөччүгэ сүрэҕэр тиэрдибиттэриттэн астынабыт уонна махтанабыт.

Тетрализованнай көстүүгэ кыттыыны ыллылар: «Сыдьаайа» үҥкүү бөлөҕө, сал. Анжелика Ноговицына, «Колорит», «Оһуор» үҥкүү бөлөхтөрө, сал. Варвара Иванова, «Сандаара» ырыа ансаамбыла, сал. Саргылаана Пономарева, «Сарыада» ырыа ансаамбыла, сал. Горьяна Стрекаловская.

Айар-тутар дьоҕурдаах, эйэлээх «Чороон» норуот айымньытын киинин Саргылана Пономарева салайааччылаах коллективка баҕарабыт айымньылаах үлэни, үрдүктэн үрдүк ситиһиилэри.

Надежда Сивцева

Читайте дальше