Бүгүн Хамаҕатта нэһилиэгин врачебнай амбулаториятыгар эми-тому атыылыыр аптека пууна аһыллыыта истиҥник ыытылынна. Аалай лиэнтэни нэһилиэк баһылыга Евгений Ушницкай, Нам улуустааҕы киин балыыһа кылаабынай бырааһа Ариан Сергеев уонна улуустааҕы аптека провизора Людмила Жиркова быһа кырыйдылар.
Евгений Сергеевич уонна Ариан Николаевич бэлиэ түгэнинэн Марина Гоголева сэбиэдиссэйдээх 8 үлэһиттээх дьоҕус кэлэктииби эҕэрдэлээтилэр, ситиһиилээх үлэни, нэһилиэнньэни эминэн-томунан толору хааччыйалларыгар баҕардылар, эҕэрдэ суруктарын туттардылар. Үөрүүлээх тэрээһини нэһилиэк «Түһүлгэ» НАК исписэлииһэ Татьяна Гаврильева өрө көтөҕүллэн ыытта, СӨ култууратын туйгуна, мелодист, ырыаһыт Сандаара Оротоо ылбаҕай ырыанан киэргэттэ.
Аптека пуунугар эми-тому фельдшер Марианна Попова атыылыаҕа. Анал хоско араас ыарыылартан эмп-томп сөптөөх ыскаапка, холодильникка хараллыбыттар. Мантан ыла нэһилиэк олохтоохторо эмп атыылаһа улуус киинигэр тиэстибэккэ, амбулаторияҕа көрдөрүнэн, үрдүттэн атыылаһар усулуобуйалара баар буолбут.
Бэлиэтээн эттэххэ, Хамаҕатта нэһилиэгэр 2024 с. — Доруобуйа сылынан биллэриллэн ааһан эрэр уонна быйыл сэтинньи ыйга Кириэс Кытыллааҕы балыыһа 80 сылын бэлиэтиир. Билигин онно анаммыт – нэһилиэккэ доруобуйа харыстабылын тэрилтэтэ сайдыытын кэрэһэлиир кинигэ оҥоһуллан үмүрүйэрэ чугаһаабыт. Ити курдук Хамаҕаттаҕа кэрэ-бэлиэ түгэннэр түмүллүбүт кэмнэригэр дьон кыһалҕатын быһаарарга туһуламмыт, улууспутугар 15-с эми атыылыыр аптека пууна аһыллыбыта кэрэхсэбиллээх.
Касьян Олесов-Олук