И.Е. Винокуров аатынан Хатыҥ Арыы орто оскуолатыгар Россияҕа Аҕа дойдуну көмүскээччи, Саха сиригэр Ийэ дойдуну көмүскээччи, Нам улууһугар Кыайыы 80 сылларын арыйыы буолла.
Олунньу 10 күнүгэр Аппааны бөһүөлэгин спортсаалатыгар мустубут оскуола үөрэнээччилэригэр нэһилиэк баһылыга Иван Ноговицын, И.Е. Винокуров аатынан Хатыҥ Арыы орто оскуолатын дириэктэрэ Павел Оконешников Улуу Кыайыы 80 сылын көрсөр тэрээһин аһыллыытынан эҕэрдэлээбиттэрин дириэктэри иитэр-үөрэтэр чааска солбуйааччы Валентина Максимова иһитиннэрэр.
“Чаҕылыс” уолаттар ааҕар бөлөхтөрө (сал. Васильева А.Е.) Кыайыы 80 сылыгар аналлаах хоһооннорун аахтылар. Улахан кылаас уолаттара (сал. Сивцев М.М.) биир дойдулаахпыт поэт И.Д. Винокуров-Чаҕылҕан “Хайыһар” ырыатын ыллаатылар. Хатыҥ Арыы оскуолатын ОБЗР учуутала Сивцев Денис Николаевич салайыытынан строевой хаамыыны улахан кылаас уолаттара көрдөрдүлэр.
Түмүккэ, 2024 сыллаах оскуола выпускнига Стрекаловскай Володя ийэтинээн Татьяна Степановналыын суруйбут хоһоонун оскуола үөрэнээччитэ барыта, биир тыынынан аахта.
Мин Хатыҥ Арыы ыччата-
Кэрэхсиибин Аар айылҕабын,
Ытыктыыбын төрүт түөлбэбин,
Таптыыбын төрөөбүт дойдубун.
Мин Хатыҥ Арыы ыччата-
Киэн туттабын ытык дьоммунан,
Сайдабын билии суолунан,
Кынаттанабын алгыс тылынан
Мин Хатыҥ Арыы ыччата-
Түстүүбүн үтүөнү-кэрэни,
Дьулуһабын дьоһун олоххо,
Дьоллоохпун сырдык кэскилинэн!
Улуу Кыайыы 80 сылын көрсө Хатыҥ Арыы нэһилиэгин кэнчээри ыччата, үөрэҕи, үлэни өрө тутарга күүстэрин уураллар, санааларын түмэллэр.
Надежда Сивцева