Хатыҥ Арыыга нэһилиэк дьаһалтатын 2024 сыллааҕы үлэтин очуоттаатылар

Тохсунньу 15 күнүгэр «Хатыҥ Арыы нэһилиэк» МТ дьаһалтатын уонна баһылык Иван Ноговицын 2024 сыллаах үлэтин отчуота үс бөһүөлэгинэн ыытылынна.

Күнүс 11 ч. Кыһыл Дэриэбинэ «Сайдыы» култуура дьиэтигэр 29 киһи кэлэн отчуоту иһиттэ. Баһылык Иван Ноговицын уонна нэһилиэк депутаттарын сэбиэтин председателэ Евгений Жирков ыытыллыбыт үлэни сырдаттылар. Олохтоохтортон оҕо былаһааккатын тутуутун, автобус тохтобулун, хаарбах дьиэттэн көһүүнү, көрүүтэ суох сылдьар бэйдиэ ыттары тутуу, федеральнай суол өрүмүөнэ, тутааччылар хаалларбыт бөхтөрүн хомуйуу, Э. Сивцев, Н. Гоголев аат. уулуссалары сырдатыы, Юбилейнай муостата о.д.а. боппуруостар бэрилиннилэр. Түмүккэ дьаһалта үлэтин сыанабылыгар биир киһи туттунна.

Күн иккис аҥарыгар Граф Биэрэгинээҕи «Самородок» култуура дьиэтигэр мустан – уопсайа 47 киһи отчуоту иһиттэ. Быйыл Граф Биэрэгэр элбэх хорумньуну аҕалбыт сааскы халаан уутун кэнниттэн, чөлүгэр түһэриигэ туох үлэ барбытын туһунан баһылык Иван Ноговицын сиһилии сырдатта. Олохтоохтортон сүрүн ыйытыктар халаан уутуттан эмсэҕэлээбит ыалларга биир кэмнээх көмө харчы киириитэ, федеральнай төлөбүр, дьиэ улахан өрөмүөнүгэр киирдэ. Маны тэҥэ олохтоохтор социальнай боппуруостары таарыйдылар, ол курдук Советская, Песчаная уулуссаҕа уот сырдатыыта, саҥа уу хачайдыыр мотуор наадатын, оттооччуларга сайын паром сылдьыбата көчүмэҕэйдэри үөскэтэрин туһунан, көрүүтэ суох ыттарга туох миэрэ ылылларын, дэриэбинэ иһинээҕи суолларга өрөмүөн үлэтэ барыахтааҕын, Затон ситэтэ суох оскуола иннигэр оҕолор туоруулларыгар тротуар наадатын, Кыайыы өйдөбүнньүгэр уонна часовняҕа уот ситимэ суоҕун, олохтоох култуура дьиэтэ олус тымныытын, улахан өрөмүөнү эрэйэрин туһунан этиилэр киирдилэр. Түмүккэ Граф Биэрэгин олохтоохторо дьаһалта үлэтин бары биһирээтилэр.

Киэһэ 17 чаастан Аппааны бөһүөлэгин «Чороон» норуот айымньытын киинигэр дьаһалта отчуотун 53 киһи кэлэн иһиттэ. Кинилэр истэригэр тыа хаһаайыстыбатынан дьарыктанар эдэр уолаттар Арыйан Винокуров, Василий Петров кытыннылар. Арыйан Винокуров ходуһаларын оттообот ыаллартан сирдэрин ылар үлэ ыытан, ол сирдэри арендаҕа бэриллиитин үөрэтэн көрүүнү, бааһына наадатын, ыччаты тыа хаһаайыстыбатыгар сыһыарыы кэмэ кэлбитин, кооператив тэринэргэ туох көмө баарын, мелиоративнай үлэ күүскэ барыахтааҕын туһунан эттэ. Онуоха, Нам улууһун тыатын хаһаайыстыбатын управлениятын начальнига, улуус сэбиэтин депутата Владимир Макаров тыа хаһаайыстыбатыгар үлэлии турар программалары сырдатта, харда хоруйдары биэрдэ.

Олохтоох Михаил Сивцев сайын СПЖ сүүрбэтиттэн Ньирээйиккэ оттомокко сир бөҕө хааларын, нэһилиэктэр олохтоох дьаһалталарын систематыгар киириэхтээх уларыйыылар олохтоохтору долгутарын, сыбаалка астарыытын үлэтин хонтуруолга ылыы туһунан эттэ. Салгыы олохтоохтортон Новая уулуссаҕа суол оҥоруута, «Дьиэ кэргэн экономиката» программанан түргэнник ситэр кыыллар субсидията хойутаан киириитин, И. Решетников аат. уулуссаҕаа уот ситимин тардыы, маршрутнай автобус сырыытын, арыыга өртөөһүн, саас эрдэ трассаҕа баар турбалары бүөлээн үлэ барыан наадатын о.д.а. этиилэр киирдилэр. Түмүгэр Хатыҥ Арыы дьаһалтата 2024 сылга ыыппыт үлэтин биһирээтилэр.

Надежда Сивцева, Аппааны

Читайте дальше