Хоту эҥээр дьахталлара Хатырыкка түмүстүлэр

Хатырык нэһилиэгэр хоту эҥэр дьахтар сүбэтэ мустан Улуу Кыайыы 80 сылын көрсө эстафетатын арыйда.

Олунньу 27 күнүгэр уһулуччулаах государственнай, политическэй деятель Максим Кирович Аммосов төрөөбүт дойдутугар Хатырык култуура киинигэр хоту эҥэр нэһилиэктэрэ – Аппааны, Кыһыл Дэриэбинэ, Бөтүҥ, Модут, Хатырык дьахтар сүбэлэрэ муһуннулар. Уопсайа 21 далбар хотун кыттыыны ылла. Ыҥырыылаах ыалдьыттары Хатырык «Далбар Хотун» дьахтар сүбэтин салайааччыта Аглаида Алексеевна Макитова көрүстэ. Регистрация кэннэ улахан култуура киинин билсэр сыаллаах тэрээһин кыттыылаахтарыгар квест оонньуу тэрийдэ. Манна түөрт хамаанда буолан үс сорудаҕы толордулар. Ол курдук, сэрии кэминээҕи ырыалары таҥнары матыыбынан таайыы, мөһөөччүккэ мээчиги быраҕыы, Аҕа дойду сэриитин уонна анал байыаннай дьайыы тематыгар викторина боппуруостарын таайыы күрэхтэрэ ыытылыннылар.

Манна «Сулус» хамаанда кыайыылаах тахсан сэмэй бэлэх тутта. 2025 сыл Дойду Президенэ Владимир Владимирович Путин уурааҕынан дойдуга – Аҕа дойдуну көмүскээччилэр, Саха Өрөспүүбүлүкэтигэр Ил Дархан Айсен Сергеевич Николаев ыйааҕынан – Ийэ дойдуну көмүскээччи, Нам улууһа муниципальнай тэриллии баһылыга Юрий Иннокентьевич Слепцов дьаһалынан – Кыайыы сыллара биллэриллибиттэрэ. Киэҥ саалаҕа мустан олорор ыалдьыттарга эҕэрдэ тылларын Хатырык нэһилиэгин «Далбар Хотун» дьахтар сүбэтин председателэ Аглаида Макитова, Модут нэһилиэгин дьахтар сүбэтин председателэ Татьяна Николаевна Сивцева, Бөтүҥ нэһилиэгин дьахтар сүбэтин аатыттан Анна Семеновна Евстафьева үтүө бачыымы көҕүлээбит Хатыҥ Арыы нэһилиэк дьаһалтатын сүрүннүүр исписэлииһэ Надежда Дмитриевна Сивцева уонна култуура киин дириэктэрэ Елена Владимировна Ефремова эттилэр. Култуура киинин үлэһитэ Любовь Ильинична Левина “Сахам сирэ” ырыатын бэлэх уунна.

Бу күн Модут дьахтар сүбэтэ көһө сылдьар өйдөбүл альбому Хатырык нэһилиэгин дьахтар сүбэтигэр үөрүүлээх быһыыга-майгыга туттарда. Бу эстафета альбома өссө Улуу Кыайыы 75 сылын көрсө оҥоһуллубут, ол кэннэ кэмэ, кэрчигэ кэлэн салгыы хоту сытар нэһилиэктэринэн айанныаҕа. Альбом ыам ыйыгар диэри хоту сытар нэһилиэктэри кэрийэн, нэһилиэктэргэ баар Аҕа дойду сэриитин кыттыылаахтарыгар анаммыт Улуу Кыайыы пааматынньыктара, сквердэрэ, ытык сирдэрэ сырдатыллан, түмүллэн, альбомҥа тиһиллиэхтээх. Түмүгэр Улуу Кыайыы 80 сылыгар И.Е. Винокуров аатынан Хатыҥ Арыытааҕы историяны уонна кыраайы үөрэтэр түмэлгэ дьахтар сүбэлэрэ кэлэн туттарыахтара.

Салгыы толору астаах, минньигэс туортаах остуолга олорон эрэ Далбар Хотуттар инники былааннарын кэпсэттилэр. Улуу Кыайыы 80 сылын көрсө Далбар Хотуттар үгүс үлэ күүтэрин, бары түмсүүлээх буолуохтарын, Нам улууһа сайдарын туһугар, баһылык Юрий Слепцов тула түмсэн күүстэрин ууран туран үлэлииллэригэр сорук туруордулар.