Сэтинньи 6 күнүгэр Хатыҥ Арыы нэһилиэгин дьаһалтатыгар биир дойдулаахтарбытын Мария Сивцеваны, Татьяна Замятинаны, алтынньы 29-31 күннэригэр Красноярскай куоракка «Огни Енисея» Бүтүн Россиятааҕы дартс күрэхтэһиитигэр үрдүк ситиһиилэринэн эҕэрдэлээтибит.
Нэһилиэк дьаһалтатын баһылыгын э.т. Максим Мордосов, ыччат уонна спорт отделын дириэктэрэ Егор Бурнашев кыайылаахтары итиитик-истинник эҕэрдэлээн туран, эҕэрдэ суруктары, сибэкки дьөрбөтүн, спорт отделын аатыттан сертификаттары туттардылар.
Мария Сивцева И.Е. Винокуров аатынан Хатыҥ Арыы орто оскуолатыгар физкультура учууталынан үлэлиир, нэһилиэк депутата, Нам улууһун, Хатыҥ Арыы нэһилиэгин «Сыл бастыҥ спортсмена», «Сыл бастыҥ спортивнай дьиэ кэргэн» хас да төгүллээх номинана буолар. Мария Александровна Красноярскайга ыытыллыбыт күрэхтэһиигэ дьахталларга биирдилээн киирсиигэ — 1 миэстэ, миксткэ — 1 миэстэ, хамаанданан киирсиигэ — 1 миэстэни ылары ситистэ.
Татьяна Замятина «Сандаара» оҕо уһуйаанын бухгалтера, бастыҥ спортсменка, нэһилиэк общественнай олоҕор көхтөөх кыттааччы, Красноярскайга ыытыллыбыт күрэхтэһиигэ Нам дартсменкаларын хамаандатыгар киирэн 1 миэстэни ылары ситистилэр.
Кыайыы көтөөллөөх кэлбит кыргыттарбытын өссө төгүл үрдүк ситиһиилэринэн эҕэрдэлиибит.
Надежда Сивцева