Санаа сылааһын түмэн, сырдык сааскы Маай, Үлэ, Эйэ бырааһынньыктарын «Ипподром» түөлбэ дьоно сэргэтэ, олохтоохторо сырдыктык көрүстэ. Ыам ыйын 3 күнүгэр түөлбэ олохтоохторо бары түмсэн улахан ырааһырдыы субботнигын оҥордубут.
Сыл аайы буоларын курдук, ырааһырдыыны хас биирдии олохтоох олорор дьиэтин инниттэн саҕалаатыбыт, олорор уулуссаларбыт, сылдьар ыллык суолларбыт, айан суолун кытыыларыттан кыра бөхтөрө барыта хомуллан биир да кир-сыыс хаалбакка сандаара ырааһырдылар.
Ипподром иһигэр киирэн элбэх бөҕү хомуйдубут, манна элбэх киһи сылдьан, олорон ааһар. Бөхтөрүн барытын олорбут сирдэригэр быраҕан бараллара сөхтөрөр, сыл аайы саамай элбэх бөх мантан хомуллар. Аны үс бөх тоҕор дьааһыктарбыт киһи барыта көрөн ааһар сиригэр турар буоланнар, бөҕө наар толору, массыыналаах дьон иһинэн-таһынан быраҕан ааһаллар. Барытын ыраастаан, аттын кылбаччы харбаан, бөҕүн барытын сааһылаан бырахтыбыт. Бөх быраҕар анал баахтарбыт арыычча үрдүктэрэ эбитэ буоллар, эбэтэр сабыылааҕа буоллар бөх тула өттүгэр ыһыллара аҕыйыа эбитэ буолуо дуу. Бөх угар дьааһыктарбытын тугу эрэ толкуйдаан атыннык, көстүүтүн тупсаҕай соҕустук оҥороллоро буоллар, — диэн санаалар киирэллэр. Саамай көстөр ипподроммут аттыгар турар бөх тоҕор дьааһыкпыт олорор сирбитин олус буортулуур, кэлбит ыалдьыт барыта көрөн ааһар сиригэр турар.
«Ипподром» түөлбэ олохтоохторо бары тахсан дьиэлэрин таһын, уулуссаларын ыраастаан үлэ бырааһынньыгын, өрөбүл күнү көхтөөхтүк атаардыбыт, олох бэйэтэ үлэ бырааһынньыга буолла. Маннык түмсүүлээх, сэргэх олохтоох дьоммутунан-сэргэбитинэн киэн туттабыт. Субботникка кэлбит олохтоохторугар «Ипподром» түөлбэ салайааччыта Татьяна Иннокентьевна истиҥ махтал тылларын эттэ.
«Ипподром» түөлбэ актива,
Күбэйэ — Хотун