Ахсынньы 11 күнүгэр күнүс 3 чаастан Искра нэһилиэгин Күрэҥ-Ат бөһүөлэгэр, спортзалга нэһилиэк администрациятын баһылыга Новгородов Андрей Григорьевич уонна тэрилтэлэр 2025 сыллааҕы үлэлэрин отчуотугар балайда киһи мустубут.
Тэрилтэлэр салайааччылара үлэлэрин отчуотун сурунан, хаартыскаларынан слайда оҥорон көрдөрө-көрдөрө кэпсээбиттэрэ олус кэрэхсэбиллээх, дьоҥҥо тиийимтиэ буолла. Түмүгэр баһылык отчуотун иһиттибит.
Тыл эппит дьон, отчуоттар сүнньүлэринэн инникитин баҕа санааларын этэн, былааннаммыт үлэлэр толоруллубуттарын ыйан, бу ыарахан кэмнэргэ баһылыктарын тула сомоҕолоһон бииргэ түмсэн үлэлиэххэ, олоруохха диэтилэр, үлэлэри биһирээтилэр.
Нэһилиэк ытык кырдьаҕаһа Рожин Иннокентий Герасимович урукку кэмнэргэ олорон, үлэлээн ааспыт олоҕун, үлэтин, кинилэр эбээлэрин, эһээлэрин тустарынан ыччаттарыгар холобур оҥостон кэпсээтэ. Үлэлэри биһириирин, инникитин да кырдьаҕас дьон кыһалҕатыгар болҕомтоҕут уҕараабатын диэн эттэ.
Онон мустубут дьон баһылык Новгородов А. Г. уонна общественнай тэрилтэлэр 2025 сыллааҕы үлэлэрин биһирээтилэр, инникитин ситиһиилээх үлэни, өйдөһүүнү, өйөһүүнү, бары биир өйгө-санааҕа түмсэн үлэлиэххэ, олоруохха диэн санаалаах тарҕастылар.
Алаас Маайата, Искра