Улуу Кыайыы 80 сыллаах үбүлүөйүн көрсө «Кыайыы Кыһыл Знамята «Бүтүн өрөспүүбүлүкэтээҕи «Бары бииргэ — Кыайыыга» диэн девизтээх эстафетата 2025 с. тохсунньу 9 күнүгэр сахалартан бастакы Сэбиэскэй сойуус дьоруойа Фёдор Кузьмич Попов төрөөбүт-үөскээбит дойдутуттан — Мэҥэ Хаҥалас улууһун Баатара нэһилиэгиттэн саҕаламмыта.
Бүгүн, олунньу 6 күнүгэр, Хомустаах 2-с нэһилиэгэр Кыайыы Знамята Бөтүҥ нэһилиэгиттэн кэллэ. «Сэргэлээх» культура уонна спорт киинигэр нэһилиэк олохтоохторо, оскуола үөрэнээччилэрэ, оҕо уһуйаанын бэлэмнэнии бөлөҕүн иитиллээччилэрэ үөрүүлээхтик көрүстүлэр.
Долгутуулаах түгэҥҥэ Нам улууһун баһылыгын социальнай боппуруостарга солбуйааччы Егор Протопопов Хомустаах 2-с нэһилиэгин баһылыгын э.т. толорооччу Сергей Никоновка Кыайыы Знамятын үөрүүлээх быһыыга-майгыга туттарда.
Е.П. Сивцев аатынан 2 Хомустаах орто оскуолатын байыаннай формалаах 11-с кылааһын үөрэнээччилэрэ Осипов Альберт, Захаров Семен, Протопопов Ариан Кыайыы Кыһыл Знамятын күөрэччи көтөҕүн сыанаҕа тахсан турдулар.
Эҕэрдэ тылы Нам улууһун баһылыгын социальнай боппуруостарга солбуйааччы Егор Андреевич Протопопов, Хомустаах 2-с нэһилиэгин баһылыгын солбуйааччы Сергей Саввич Никонов, «Алгыс» ветераннар сэбиэттэрин бэрэссэдээтэлэ Надежда Ивановна Сивцева эттилэр.
Уоттаах сэрии 1941-1945 тыйыс сыллара төһө да ыраатталлар, ол ыар кэмнэри, фашизмы самнарыы, Улуу Кыайыы төһө уустуктук кэлбитин умнар кыахпыт суох. Кыайыы Кыһыл Знамята тэлэбирии кыыстын, суох буоллун сэрии, эйэлээх олох, күөх халлаан чэлгийдин!
Саргылана Попова, «Сэргэлээх» ЭКК методиһа.