Быйыл сэтинньи 1-8 күннэригэр Российскай Федерация бары субъектарыгар “Улахан этнографическай диктант” 10-с үбүлүөйдээх сырдатар акция ыытылла турар. Дойдубут президенэ Владимир Путин көҕүлээһининэн бу акция “Народы России и СНГ” норуоттар икки ардыларынааҕы фестиваль программатыгар киирбитэ.
Ол чэрчитинэн бүгүн, сэтинньи 7 күнүгэр, Н.М. Рыкунов аатынан кииннэммит модельнай библиотекаҕа бүтүн Россиятааҕы “Улахан этнографическай диктант” ыытылынна.
Бу ураты улахан бырайыак дойдубут норуоттарын культураларын кытта билиһиннэрэр уонна нэһилиэнньэ этнокультурнай билиитин сыаналыыр, үрдэтэр сыаллаах.
Республикабытыгар акция бары улуустарыгар 310 площадкаҕа ыытыллыаҕа. Быйылгы акцияҕа бастакытын “Якутия” авиакомпания Дьокуускай-Москва-Дьокуускай рейсыгар 150 пассажир “Улахан этнографическай диктаны” суруйаллара ураты уонна бэлиэ түгэнинэн буолуоҕа.
Улууспутугар диктант 19 нэһилиэккэ ыытылла турар. Олохтоохтор сыл ахсын көхтөөхтүк кытталлар. Диктаны уопсайа 45 мүнүүтэ устата суруйаллар: барыта 30 боппуруостаах, биир сөптөөх эппиэти талан бланкаҕа суруйаллар. Саамай элбээбитэ 100 бал буолар.
Акция кыттыылаахтара “Улахан этнографическай диктант” түмүгүн сэтинньи 13 күнүгэр национальнаяполитика.рф сайтка идентификационнай нүөмэрдэринэн киирэн көрүөхтэрин сөп.
Дарина Константинова