Бүтүн Россиятааҕы бэйэни салайыныы “Малая Родина – сила России” III-с Форума Москва куоракка буола турар.
Манна уопут атастаһа, тоҕоостоох боппуруостары дьүүллэһэ киэҥ Россия бары регионнарыттан мустубуттар. Хамаҕаттаттан барбыт баһылык Евгений Ушницкай кылгас информация ыытта:
Муус устар 20 күнүттэн саҕаламмыт ааспыты сыаналыыр, бүгүҥҥүгэ кыһамньы уурар, кэлэри толкуйдуур миссиялаах Форум бэйэни салайыныы Күнүгэр сөп түбэһиннэрэн дьыалабыай платформа быһыытынан бара турар.
Нам улууһуттан нэһилиэк баһылыктара Хатыҥ Арыыттан — Иван Ноговицын, Модуттан — Ефим Гоголев, Маймаҕаттан — Айаал Байдам, Ленскэй нэһилиэктэн — Петр Сокольников, Салбаҥтан — Сахаян Аргунов, улуус депутата Светлана Поротова кыттыыны ыла сылдьабыт.
Россия регионнарын национальнай уратыларын учуоттаан туран, дьон олоҕун таһымын үрдэтиигэ, сайыннарыыга саҥа механизмнары булууга болҕомто уурулунна.
Форумҥа нэһилиэктэр, улуустар баһылыктара, салайар үлэһиттэрэ үһүс күннэрин кытта сылдьаллар. Россия норуоттарын делегацияларын доҕордоһуу, эйэлээх олох тыына түмтэ.
Мария Винокурова