Кинилэр ортолоругар бааллар «Нам улууһа» МТ баһылыга Юрий Слепцов, улуус дьаһалтатын эппиэттээх үлэһиттэрэ, «Биир ньыгыл Россия» партия Намнааҕы салаатын толорооччу секретара Сардана Еремеева, нэһилиэктэр баһылыктара, солбуйааччылара, тыа сирин түөлбэлэрин дьаһалтатын специалистара, нэһилиэктэр сэбиэттэрин бэрэссэдээтэллэрэ, депутаттара, тэрилтэлэр салайааччылара уо.д.а.
Форум кыттыылаахтара: «Киһи хапытаала – санаа күүһүгэр, талааҥҥа инвестициялар», «Доруобуйа кэскилэ — көлүөнэлэр утумнара уонна дьиэ кэргэн сыаннастара», «Культурнай код — төрөөбүт кыраай айар ньигирэ», «Территориялары сайыннарыы — куоракка уонна дэриэбинэҕэ олох хаачыстыбатын тупсуута», «Кыайыы туһугар сомоҕолоһуу», «Креативнай экономика» былаһааккаларга санааларын атастастылар.
Биир бэлиэ, үөрүүлээх түгэнинэн суруйааччы Е.С.Сивцев-Таллан Бүрэ аатынан Бөтүҥ орто оскуолатын нуучча тылын уонна литературатын учуутала Ефимова Марианна Афанасьевна партийнай билиэт ылла.
Билиэти СӨ Ил Дархана, Саха сиригэр «Биир ньыгыл Россия» партия салаатын сэкирэтээрэ Айсен Николаев туттарда.
Улууспут баһылыга Ю.И. Слепцов «Территориялары сайыннарыы — куоракка уонна дэриэбинэҕэ олох хаачыстыбатын тупсуута» диэн төгүрүк остуолга 5 сыл иһигэр туох үлэ ыытыллыбытын кэпсээтэ.
Итиэннэ: «Олохтоохтор «Народная программа» сайт нөҥүө туруорсууларын көхтөөхтүк киллэрэллэр. Саҥа баҕа санаалара, туруорсуулара бу курдук олоххо киириэхтэрэ диэн эрэнэбит»,— диэтэ.
Чахчыта даҕаны, биэс сыл иһигэр улууспутугар, олохтоохтор туруорсууларынан, үөрэхтээһин уонна культура эйгэтигэр бөдөҥ эбийиэктэр тутулуннулар. Бу эбийиэктэр тыа сиригэр аныгы, сайдыылаах олох усулуобуйатыгар үктэннэрдилэр. Ол курдук, холобура, 2021 сыллаахха Хамаҕаттаҕа 240 миэстэлээх саҥа «Тускул» детсад аһыллыбыта. Манна «Сарыал» уонна «Кытылчаан» эргэ уһуйаан иитиллээччилэрэ кэлбиттэрэ. Саҥа эбийиэк тутуллан нэһилиэккэ детсад миэстэтитэн хааччыллыы толору быһаарыллыбыта. Бу сыл Аппааныга «Чороон» норуот айымньытын киинэ аһыллыбыта. Бүгүн манна сэлиэнньэ культурнай олоҕо бүтүннүүтэ түмүллэр. Араас таһымнаах кэнсиэрдэр, уус-уран айар биэчэрдэр, куонкурустар уо.д.а. үрдүк таһымнаахтык ыытыллаллар. 2022 сылга өрөспүүбүлүкэ үрдүнэн культура эйгэтигэр саамай улахан эбийиэктэртэн биирдэстэрэ – М.К. Аммосов аатынан культура уонна духуобунай сайдыы дыбарыаһа олоххо киирбитэ. Максим Кирович төрөөбүтэ 125 сылыгар дыбарыас 5,6 тыһ. тахса кв.м. иэнигэр тобус-толору киин сэлиэнньэбит культуратын тэрилтэлэрэ: ЗАГс отделениета, культура дьиэтэ, уус-уран художественнай галерея, история уонна этнография музейа, улуус уонна оҕо библиотекалара үлэлэрин саҥалыы саҕалаабыттара. 2022 сылга Хамаҕаттаҕа 220 миэстэлээх саҥа оскуола аһыллыбыта. Оскуолаҕа нэһилиэктэн төрүттээх саха аатырбыт худуоһунньуга Ефим Михайлович Шапошников аата иҥэриллибитэ. Икки мэндиэмэннээх оскуола дьиэтэ үс блоктан турар: үөрэнэр сир, спортсаалата, 50 миэстэлээх интернат. 2024 сылга Модукка саҥа оскуола аһыллыбыта.
Билигин Нам сэлиэнньэтигэр 450 миэстэлээх саҥа таас оскуола тутулла турар.
Аҕыйах хонугунан киин сэлиэнньэбитигэр саҥа таас балыыһа тутуллан бүтэн олоххо киирээри бэлэмнэнэр.
Бу курдук, Нам улууһугар норуот программатын олоххо киллэрии кумааҕыга эрэ хаалбакка, оскуола, кулууп, балыыһа буолан дьэндэйэллэрин арылхайдык көрөбүт.
Бэйэ информ.
#ЕдинаяРоссия
#ЕР14
#ЕстьРезультат
Газета Энсиэли