Улуу Кыайыы 80 сылынан, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылларынан Ил Дархан Айсен Николаев көҕүлээбит «Кыайыы Знамята» өрөспүүбүлүкэтээҕи эстафетатын Нам улууһун бары нэһилиэктэрин дьоно-сэргэтэ көрсүөҕэ.
Бүгүн, олунньу 5 күнүгэр кэбээйилэр Нам улууһугар аҕалан туттардылар. «Кыайыы Знамята» өрөспүүбүлүкэтээҕи эстафетаны Түбэттэн саҕалаан олунньу 7 күнүгэр диэри улууспут бары нэһилиэктэригэр сырытыннаран баран хаҥаластарга тиэрдиэхтэрэ.
«Күндү биир дойдулаахтарым, Түбэ нэһилиэгин дьоно-сэргэтэ Нам улууһугар Улуу «Кыайыы Знамятын» эстафетата саҕаламмытынан итии-истиҥ эҕэрдэ!
Улуу сэриигэ аҕаларбыт, эһэлэрбит фашистскай Германия талабырдьыттарыттан Аҕа дойдуну көмүскээбиттэрэ.
Нам улууһуттан 1651 киһи барбыта. Мантан 1100 киһитэ сэрии толоонугар дьоруойдуу охтубута. Тыылга биһиги ийэлэрбит, эбэлэрбит Кыайыы туһугар, барыта фронт туһугар түүннэри-күнүстэри үлэлээбиттэрэ», — диир Нам улууһун баһылыга Юрий Слепцов.
Кэбээйиттэн улуус баһылыгын эбээһинэһин толорооччу Александр Сивцев, социальнай боппуруостарга сүрүннүүр специалист Василий Потапов, физическай култуура уонна маассабай спорт управлениетын начальнига Игнат Березкин, начальник солбуйааччыта Анатолий Мордовской, көҥүл тустууга аҕа тренер Николай Данилов уонна Батамай нэһилиэгин представителэ Нам улууһун делегациятыгар аҕалан туттардылар.
Улууспут делегацията: «Нам улууһа» МТ баһылыгын социальнай боппуруостарга солбуйааччы Егор Протопопов, улуустааҕы дьиэ кэргэн уонна ыччат отделын политикатын салайааччы Екатерина Евстафьева, улуустааҕы бэтэрээннэр сэбиэтин председателэ Софья Кобякова, байыаннай комиссар Владислав Васильев, Түбэ нэһилиэгин дьоно-сэргэтэ Кыайыы дьарылыгын үөрүүлээх быһыыга-майгыга көрүстүлэр.
«Кыайыы Знамятын» Кэбээйиттэн аҕалбыт күннэригэр Түбэҕэ, Маймаҕаҕа, Хатырыкка тэрээһин буолуоҕа. Олунньу 6 күнүгэр – Модукка, Бөтүҥҥэ, 2 Хомустаахха, Искраҕа, Таастаахха, Салбаҥҥа, Аппааныга сылдьыахтара. Олунньу 7 күнүгэр – Үөдэйгэ, 1 Хомустаахха, Партизаҥҥа, Никольскайга, Хамаҕаттаҕа, Намҥа көрсөн баран Хаҥалас улууһун границатыгар илдьэн туттарыахтара.
Дойдубутугар эйэлээх олоҕу, сырдык халлааны олохтоспут буойуттарбытын кэриэстиир, ахтар-саныыр билиҥҥи көлүөнэ эбээһинэспит. Ким да умнуллубат, туох да умнуллубат.
Семен Аргунов