Нам улууһун киинигэр, бүгүн сэтинньи 7 күнүгэр, Улуу Кыайыы 80 сылынан «Формирование комфортной городской среды» национальнай бырайыак чэрчитинэн «Ржев скверин» тупсаран оҥоһуллубутун астылар.
Сквер саҥардыллан, тупсарыллан тупсаҕай көстүүлэннэ. Электроннай аукцион кыайыылаҕынан тахсан Альберт Дьяконов ген. директордаах «Тимир-Строй» ХЭТ госконтрагынан 3 мөл. 459 тыһ. солк. тупсарыы үлэтин ыыппыт. Ол курдук, сквер территорията улаатан, күрүөтэ саҥардыллан, тротуара билиитэнэн ууруллан, сынньанар ыскамыайкаларданан, постамеҥҥа 45 мм. пушка макета туран, история кэрэһитэ буолар икки стендэни эбэн, сэргэ туруоруллан, уота-күөһэ умайан киэркэйэн силигин ситтэ.
Үөрүүлээх тэрээһиҥҥэ «Нам улууһа» МО баһылыга Юрий Слепцов, Ленскэй нэһилиэк баһылыга Петр Сокольников, улуустааҕы ветераннар сэбиэтин председателэ Софья Кобякова, сквер ааптара Михаил Петухов уола Михаил Михайлович, «Мост Памяти Ржев-Саха (Якутия)» Ржев куорат аннынааҕы кыргыһыыларга охтубут Саха Сирин буойуннарын өйөөһүн региональнай общественнай тэрилтэтин салайааччыта Николай Горохов историяны сэгэтэн билиһиннэрдилэр, ыччат салгыы үлэлэһэригэр кэс тылларын тиэртилэр. «Ржев скверэ» тупсарыллан оҥоһулларыгар быһаччы үлэлэспит дьоҥҥо, салайааччыларга, Нам 2 №-дээх орто оскуолатын көрдүүр-ирдиир этэрээтин оҕолоругар махтал сурук туттартаатылар.
Нам улууһа уруккуттан Ржев куораты кытары бырааттыы сыһыаны олохтооннор, хардарыта үгүс үлэ ыытыллар. Онон бүгүҥҥү үөрүүлээх күҥҥэ телемост нөҥүө Ржев муниципальнай уокуругун депутата, «Биир ньыгыл Россия»фракциятын депутата Валерий Румянцев, Ржев ветераннарын сэбиэтин председателэ Галина Мешкова, «Воины-Якутяне в битве под ржевом» кинигэ ааптардарыттан биирдэстэрэ, СӨ Национальнай архивын сүрүн археограба Александр Калашников эҕэрдэлэрин тиэртилэр.
Тэрээһин Иннокентий Иванов «Тыыннаахтар умнубат сыллара» ырыаны толоруутунан, сибэкки дьөрбөтүн ууруунан түмүктэннэ, өйдөбүнньүк хаартыскаҕа түһүүнэн үйэтитилиннэ.
Семен Аргунов