Бүгүн М.К. Аммосов аатынан культура Дыбарыаһыгар «Эҥсиэли эрэлэ — 2025» Нам улууһун баһылыга Юрий Слепцов харыйата улуус оскуолаларын бастыҥтан бастыҥ үөрэнээччилэрин түмтэ.
Юрий Слепцов, Нам улууһун баһылыга:
“Күндү оҕолор, убаастабыллаах төрөппүттэр, бүгүҥҥү тэрээһин кыттыылаахтара, учууталлар, барыгытын ис сүрэхпиттэн кэлэн иһэр саҥа дьылынан эҕэрдэлиибин. Нам улууһун бастыҥтан бастыҥ оҕолоро, үөрэххэ, спортка, культураҕа, общественнай олоххо инники күөҥҥэ сылдьар ыччаттарбыт үөрэххитин бүтэрэн, дойдугутугар кэлэн таһаарыылаахтык улууспут, республикабыт сайдарын туһугар үлэлиэххит-хамсыаххыт диэн улахан эрэллээхпит. Олимпиадаларга, күрэхтэһиилэргэ куруук инники күөҥҥэ буолаҕыт, улуускутун ааттата сылдьаҕыт. Ис сүрэхпиттэн махталбын тиэрдэбин.
Саха норуотун саамай ыарахан политическай кэмнэригэр биһиги биир дойдулаахтарбыт саха норуотун туһугар күүскэ үлэлээбиттэрэ. Тохсунньу 1 күнүгэр Илья Егорович Винокуров 130 сааһын бэлиэтэхпит. Саха норуотун хогуйан өлбөтүгэр, инникилээх буоларыгар Сталиҥҥа тиийэ кэпсэтэн, саха норуота сайдарыгар сүҥкэн кылааты киллэрбит киһи буолар. Аҕыйах хонуктааҕыта киэн туттар киһибит Егор Михайлович Ларионов үбүлүөйүн бэлиэтээбиппит. Бастакы конституцияны оҥорон саха норуота аныгы кэмҥэ инникилээх буоларын ситиспит киһи буолар.
Онон оҕолор, Нам улууһа, Эҥсиэли хочото саха норуотугар улахан оруоллаах. Киэн туттар дьоммут үлэлэрин-хамнастарын салҕааччылар эһиги буолаҕыт. Эҥсиэли хочотун инникилэрэ, эрэлэ буолаҕыт. Барыгытыгар үчүгэй үөрэҕи, олоххо көхтөөх буолууну баҕарабын.”
Оҕолорго үтүө баҕа санаатын, үрдүк сыанабылын, инники эрэли түстээн, Саҥа дьыллааҕы эҕэрдэтин Нам улуустааҕы үөрэх управлениетын начальнига Мария Игнатьева тиэртэ. Кини бу күннэргэ улууспутуттан 20 үөрэнээччи гражданскай форумҥа уонна Ил Дархан харыйатыгар кытталларын эттэ. Маны таһынан, Нам 1 нүөмэрдээх оскуолатын 1 кылааһын үөрэнээччитэ Кремль харыйатыгар ыҥырыылааҕын бэлиэтээтэ.
Тэрээһиҥҥэ уопсайа 311 үөрэнээччи кыттыыны ылла: 251 активист, 60 стипендиат үөрэнээччилэр. Бастыҥ үөрэнээччилэр үөрэххэ, олимпиадаларга уонна конференцияларга чаҕылхай ситиһиилэрин, искусство, культура эйгэтигэр үрдүк көрдөрүүлэрин, «Молодые профессионалы» чемпионакка уонна оҕо хамсааһынын эйгэтигэр таһымнаах ситиһиилэрин, патриотическай иитиигэ уонна техническэй хайысхаҕа дириҥ суолталаах үлэлэрин иһин улуус баһылыга Юрий Слепцов олохтообут анал бириэмийэлэринэн наҕараадаланар чиэскэ тигистилэр. Маны таһынан, стипендиаттара төрөппүттэрэ улуус баһылыгыттан Юрий Слепцовтан Махтал сурук тутан долгуйдулар, үөрдүлэр.
Үгэскэ кубулуйбут Баһылык харыйатын долгутуулаах түгэнинэн Тымныы Моруос оҕонньор Хаарчаанатынаан киирэн эҕэрдэлээһиннэрэ буолла. «Эҥсиэли эрэлэ» үөрүүлээх тэрээһини Хамаҕатта саха-француз лицейин үөрэнээччилэрэ: “Биир ситим” түмсүүтүн оҕолоро, Светлана Куличкина, уолаттар ансаамбыллара “Доҕордоһуу ырыатынан”, маны таһынан “Кустук” үҥкүүнэн киэргэттилэр.
Бүгүҥҥү үөрүүлээх тэрээһин улууспут үөрэнээччилэрин өссө да үрдүк ситиһиилэргэ кынаттаатын.
Дарина Константинова
Видео Роман Шапошников