Халдьаайыга, сыһыыга үүнэр мааны сибэкки ньургуһун, хагдаҥ сири киэргэтэн, тыһыынчанан сулуһу ыһан кэбиспит курдук дуу, эбэтэр күн кыымчааннара бытарыйан түспүттэрин курдук дуу тэтэрэн, чаҕылыйан, хайдахтаах даҕаны сүрэҕи үөрдэр, дууһаны манньытар буоллахтара эбээт…
Ханна бачча элбэх ньургуһун үүммүтүн билиэхтэрин баҕарар дьон хайаан да баар буолуохтаахтар. Ол гынан баран, бу хаартыскаҕа көстөр ньургуһун ыһыаҕа ыһыллыбыт сирин эппэппин. Тоҕо?
Хатырыктар сыл аайы ньургуһун тыллыытын баар суох кэрэ миэстэлэригэр Тараҕай мырааҥҥа тахсан көрөллөрө. Кыайыы күнүгэр баһаам элбэх ньургуһун тахсыбытын көрөн үөрбүттэрэ. Ыам ыйын 19 күнүгэр тахсан көрөн дуоһуйаары гыммыттара, аҕыйах ньургуһун нуоҕайан турарын көрөн хомойдулар ахан. Кимнээх эрэ кэлэн барытын үргээн (кырыйан) ылбыттар, арааһа эмп оҥостоору. Кэрэни кэрэхсээбэт дьон эбиттэр…
Онон баалаамаҥ, ити кэрэ бэйэлээх сир ханна баарын этэн биэрдэхпинэ, эмиэ Хатырыкка Тараҕай мыраанын курдук сүлэн ааһыахтара. Оттон ким билбит сэрэнэн, харыстаан сылдьаргытыгар сүбэлиибин.
Ньургуһун барахсан ньургутуу үүнэн нусхайа турарын көрүөххэ күндүтүөн!
Эрчим Баһыл, суруналыыс