Намнааҕы “Олимпик” спорт оскуола иитиллээччилэрэ боксаҕа уонна гиирэ спордугар бастыҥнарын көрдөрөллөр.
Бурятия Таксимо бөһүөлэгэр регионнар икки ардыларыгар ыытыллыбыт бокса турнирыттан Муксунов Эрчим кыһыл, Иванов Эрэл үрүҥ көмүс, Львов Любомир боруонса мэтээллэри аҕаллылар. Ол курдук, сэтинньи 22-24 күннэригэр буолбут боксаттан Нам оҕолоро ситиһиини аҕалан иһэллэрэ, олус бэрт сонун.
Эдэр боксердары үчүгэй көрдөрүүлэрин иһин уонна тренер Николай Иванову эҕэрдэлиибит!
Улуустааҕы “Олимпик” спорт оскуола үгүс күрэхтэһиилээх ыйы атааран эрэрин дириэктэр Изабелла Массаева этэр.
Бурятия Улан-Удэ куоракка сэтинньи 21-24 күннэригэр үтүөлээх спорт маастара Сергей Леонов бирииһигэр гиирэҕэ Бүтүн Россиятааҕы күрэхтэһии түмүктэннэ. Гиирэ спордугар сыллата ыытыллар таһымнаах күрэхтэһиигэ “Олимпик” оскуола иитиллээччитэ Харатаала Арчылаан уонна тренерэ Иннокентий Окоемов кыттыыны ыллылар.
Харатаала Арчылаан икки көрүҥҥэ кыттан гиирэни өрө таһаарыыга 2 миэстэ, оттон өрө анньыыга төрдүс миэстэ буолбут. Уопсай түмүккэ, боруонса мэтээлгэ 6,5 очукуо тиийбэтэҕэ барыбытыгар да кыһыылаах.
Оттон тренер Иннокентий Окоемов эр дьоҥҥо 2 миэстэ уонна ветеран-эр дьоҥҥо 2 миэстэ буолбут.
“Гиирэҕэ ыытыллар Бүтүн Россиятааҕы күрэхтэһиигэ биһиги спортсменнарбыт дьаныардаахтык дьарыктананнар үтүө түмүк көрдөрөллөрүттэн үөрэбит”, – диир Изабелла Сергеевна.
Арчылаан Харатааланы уонна тренер Иннокентий Окоемовы эҕэрдэлиибит. Кыайыылар, ситиһиилэр өссө да иннибитигэр!
Харысхан Попов