Күн-дьыл түргэнник ааһар, күһүн тыына биллэн эрэр. Сотору оттук сезона саҕаланыа. Онно бэлэмнэнии үлэтэ хайдах барарын билсээри «НКТЭ» АО хонтуоратыгар тиийэ сырыттым.
Евтропий Тихонов, ген. дириэктэри 1 солбуйааччы:
-Улуус үрдүнэн барыта 39 гаас уматыгынан уонна 8 чоҕунан оттуллар котельнайдар бааллар. Кыһыҥҥы оттук сезона бүтээтин кытта бары котельнайдарга косметическай өрөмүөн ыытыллыбыта. Билигин оттук сезонугар бэлэмнэнии үлэ былаанынан бара турар. Котельнайдарга кыралаан өрөмүөннэри ыытабыт. Нам сэлиэнньэтигэр барыта 7 квартальнай котельнай баар, үксүлэрэ эргэрдилэр. Сайын, күһүн ардахха тэстии буолааччы. Бу сайын устата олортон киин балыыһа, РУС, 3-с, 4-с квартальнай котельнайдар кырыыһаларын уларыттыбыт. Ититэр трасса ситимигэр РУС кэннигэр, 3-с квартальнай котельнайтан Намнааҕы педколледжка барыыга аллара түспүт өттүн өрө таһааран көннөрдүбүт.
Улуус киинигэр, нэһилиэктэргэ емкостаах котельнайдарга барыларыгар сайҕааһан үлэтэ ыытыллыбыта. Производственнай учаастактар начальниктара, слесарьдар үлэлэригэр соторутааҕыта тахсыбыттара, бэлэмнэнии үлэтин саҕалаабыттара. Онтон гаас оператордара, кочегардар атырдьах ыйын бүтүүтэ үлэлэригэр тахсыахтара, балаҕан ыйыгар бары баар буолуохтаахтар. Бытархай үлэ элбэх, оттук сезона аһыллыан иннинэ ону барытын туоратыахтара.
Бэйэ информ.