2025 сыл сүрүн бырааһынньыга, Кыайыы күнүн 80 сыла, хас нэһилиэк аайы бу күннэргэ кыһыны быһа бэлэмнэнэн бэлиэтэннэ. Салбаҥҥа «Салбаҥ Кыайыыны уруйдуур!» диэн үбүлүөйдээх парад буолан ааста. «Албан аат» скверигэр парадтаан хааман тиийэн, бастакы
«Өйдөбүнньүк» пааматынньыкка венок уурдулар.
Тыыл ветеранын Мария Александровна Олесованы, сэрии оҕолорун Клара Гаврильевнаны, Гастелло Петровиһы чиэстээтилэр. 90 сааһын туолаары сылдьар Мария Александровна тыыл үлэтэ хайдаҕын, билигин үлэһит буолан, үлэнэн үйэтинэргэ, бэйэ-бэйэҕэ көмөлөсүһэргэ болҕомто ууруллуохтааҕын эттэ.
Парад умнуллубат түгэнинэн «Өйдөбүнньүк ыскамыайкатын» үөрүүлээх аһыллыыта буолла. Үлэ, сэрии бэтэрээнэ Семён Данилович Оконешников төрөөбүтэ 100 сылын туоларынан уонна кэргэнэ үлэ, тыыл бэтэрээнэ Анна Ивановна Протопопова сырдык кэриэстэригэр анаан оҕолоро, сиэннэрэ, хос сиэннэрэ кыттыһаннар, «Кыайыы» скверигэр ыскамыайка сакаастаан, оҥотторон туруордулар. Бу үтүө бачыымы сэрии, үлэ ветераннарын оҕолоро сэргээтилэр, дьоннорун үйэтитэргэ сквергэ «маннык ыскамыайкалары кэккэлэппит киһи» диэтилэр.
Оҕолуун-кырдьаҕастыын балаҕан далбардара буһарар минньигэс «Саллаат хааһытын» сиэтилэр, киэһэтин эҕэрдэ кэнсиэргэ муһуннулар.
Т. Касьянова