Быйыл өрөспүүбүлүкэ правительствота нэһилиэнньэҕэ отчуота үгэскэ кубулуйбут ньыманан барыаҕа. Тустаах салайааччылары кытта дьон-сэргэ атах тэпсэн олорон кэпсэтэрин өрөспүүбүлүкэ Ил Дархана улахан суолталаах диэн «Прямой разговор» биэриигэ быһаарда. Кини этэринэн, дьон өрөспүүбүлүкэ салалтатын кытта отчуоттарга көрсөн, наадалаах информацияны ыларын ордорор.
«Коронавирус ыарыытын кэмигэр правительство отчуоттара онлайн көрүҥүнэн ыытыллыбыттарын дьон олох сөбүлээбэтэҕэ. Олохтоохтор, ордук тэйиччи сытар нэһилиэктэргэ, араас темаҕа кэпсэтиэхтэрин, кыһалҕаларын, холобура, культура киинин өрөмүөнүн курдук боппуруостары быһаартарыахтарын баҕараллар. Бу саамай сөп», — диэн бэлиэтээтэ Айсен Николаев. Отчуоттар кэмнэригэр правительство чилиэннэрэ бэйэлэринэн тиийэн олохтоохтору кытары көрсөн, кэпсэтэн үгүс боппуруостары быһааран, өйдөтөн биэрэллэр. Маны тэҥэ, дьону кытта салайааччылар тустаах көрсүһүү тэрийэллэр итиэннэ социальнай эбийиэктэргэ сылдьаллар.
Ил Дархан бэлиэтээбитинэн, правительство отчуоттара Саха сирин бастакы президенэ Михаил Ефимович Николаев инициативатынан 1999 сылтан ыытыллар буолбуттара. Өрөспүүбүлүкэбит маннык көрүҥ отчуоттары региоҥҥа бастакынан ыытан саҕалаабыта. Кэлин РФ атын субъектара биһиги холобурбутун ылыммыттара.
Нам улууһугар СӨ правительствотын отчуота олунньу 25-27 күннэригэр кэлэрэ былааннанар.
СӨ Ил Дарханын уонна СӨ правительствотын пресс-сулууспата
Хаартыскаҕа: Редакция архыыбыттан былырыыҥҥы правительство отчуоттара