Т.К. Ядрихинская аатынан Намнааҕы социальнай-геронтологическай киин аһыллыытыгар СӨ Ил Дархана Айсен Николаев доруобуйаларынан хааччахтаах уонна аҕам саастаах дьоҥҥо аналлаах массыынаны ыларга сертификат туттарбыта. Кииҥҥэ бүгүн анал тэриллээх массыына кэлэн киин олохтоохторо үөрүүлэрэ үксээтэ.
«2023 сыллаахха киин аһыллыытыгар Ил Дархан Айсен Сергеевич анал массыына ыларга сертификат туттарбыта. Докумуонун оҥорсон, туорга таһааран «Колми» ХЭТ-и кытары хантараак баттаспыппыт. Ол түмүгүнэн Нижний Новгородка «ГАЗ» заводка оҥоһуллан, ирдэбилгэ толору эппиэттиир массыынабыт кэллэ. Анал оҥоһуулаах «ГАЗель» массыынабыт 8 миэстэлээх, онтон иккитэ инвалиднай кэлээскэҕэ аналлаах. Онон билигин кэлэрбитигэр-барарбытыгар улахан көмө буолуо диэн үөрэбит.
Биһиги үлэбитигэр массыына тыын боппуруоспут этэ. Ол курдук, олохтоохторбутун балыыһаҕа, култуура тэрээһиннэригэр, итиэннэ Дьокуускайга курортнай эмтэниигэ илдьиигэ-аҕалыыга ыарахаттары көрсөр этибит. Саҥа массыыналанаммыт олуһун үөрдүбүт. Өрөспүүбүлүкэбит үрдүкү салалталарыгар улахан махталбытын тиэрдэбит», — диэн Т.К. Ядрихинская аатынан Намнааҕы социальнай-геронтологическай киин директора Инна Сивцева санаатын үллэһиннэ.
Киин олохтоохторо олуһун үөрбүттэр. Биир сиргэ олорбокко араас тэрээһиннэргэ кытта барыахпыт-кэлиэхпит дэһэллэр. Массыынаҕа киирэн көрөн-истэн, олорон көрөн санаалара көнньүөрэр.
«Бүгүн биһиэхэ улахан үөрүүлээх-көтүүлээх, өрөгөйдөөх күн үүннэ. Саҥа дьиэбитигэр киирэрбитигэр Ил Дархан кэлэн биһиэхэ аналлаах массыына ыларга сертификат туттарбыта олоххо киирэн, күн бүгүн дьиэбит таһыгар кэлэн үөрүүбүт икки төгүл үрдээтэ. Саха сиригэр биир улахан дьиэҕэ, бары усулуобуйа барыта баар киинигэр, өссө саҥа массыыналаммыт олохтоохтор кииммит чиэһин түһэн биэриэ суохтаахпыт. Төһө кыалларынан общественнай олоххо-дьаһахха, үлэҕэ, култуурунай-маассабай тэрээһиҥҥэ бары күргүөмүнэн көхтөөхтүк кыттыахтаахпыт. Кииммит чиэһин үрдүктүк тутуоххайыҥ!», — диэн киин кырдьаҕас олохтооҕо Егор Феофанов дьонугар-сэргэтигэр туһаайан тыл эттэ.
«Бүгүн чыпчаал үөрүү күнэ. Иннибитигэр сабыс саҥа массыына… Бары үөрбүт-көппүт харахтар… Государствобыт толору бэлэмигэр, табыгастаах усулуобуйаҕа олорор дьон быһыытынан, бэйэбит үрдүк култуурабытын, кыахпытын, үтүө майгыбытын-сигилибитин, дьоҥҥо сымнаҕас сыһыаммытын холобур быһыытынан көрдөрүөхтээхпит», — диэн киин олохтооҕо Мария Боченина бииргэ олорор дьонугар туһаайан тус санаатын тириэртэ.
Саҥа массыыналаммыт дьон быһыытынан, үөрэн-көтөн алгыстаах алаадьы сырдьыгынатан алгыс тылын анаан, массыыналарыгар олорон Саҥа дьыл харыйатын баран көрдүлэр.
Семен Аргунов