Алексей Ильич бу сыл алтынньы 22 күнүгэр Ил Түмэн “Саха Республикатын Конституциятыгар” (Төрүт сокуонугар) уларытыылары уонна эбиилэри киллэрии туһунан» конституционнай сокуон бырайыага бүтэһиктээхтик ааҕыллан ылыллыбытыгар тохтоото.
Ол курдук кини, Саха сирин Баһылыгын туспа боломуочуйаларыгар уонна РФ Президенэ анаабыт республика баһылыгын эбээһинэһин быстах кэмҥэ толорор быраап статуһугар сыһыаннаах уонна Төрүт сокуоммут 22, 72, 76, 97, 100 уонна 101 ыстатыйаларыгар тоҕо уларытыылар киирбиттэрин быһаарда, санаатын үллэһиннэ.
Мустубуттар Алексей Ильичкэ ыйытыылары биэрэн хардалары ыллылар, бэйэлэрин санааларын үллэһиннилэр.
М.Игнатьева, үөрэх управлениетын начальнига:
Саамай тыын боппуруоспут үөрэх эйгэтигэр ыытылла турар уларыйыылар, оптимизация. Дьон-сэргэ бары билэллэр, үөрэх эйгэтигэр уларыйыылар киирэн эрэллэр. Улууспутугар оптимизация хаамыытынан уставтарбытыгар дьаарыстаныы барыахтаах. Ити туһунан биһиги 59 үөрэхпит тэрилтэлэригэр Икки боппуруоска ыарырҕаттыбыт. Бастатан туран, штатнай расписаниеҕа рекомендация быһыытынан кыччатыы боппуруоһа баран эрэр. Саамай улахан биһиги наадыйар штаттарбыт – социальнай педагогтарбыт, старшай баһаатайдарбыт, педагог-организатордарбыт. Билигин, билэргит курдук, байыаннай дьайыы буола турарын быһыытынан, иитии чааһыгар улахан үлэлэр бара тураллар. Онон социальнай педагогтарбыт штаттара кыччаабыта ыарахаттары үөскэтэр. Бу боппуруоһу туруорсуохпутун баҕарабыт. Иккиһинэн, Ленскэй нэһилиэкпитигэр 11 уһуйааннаахпыт. Иитиллээччилэр норматив быһыытынан биир группаҕа 20-25 оҕо тутуллуохтаах эбит буоллаҕына, уһуйааннарбыт дьиэлэрэ эргэ буоланнар биһиги 14-15 оҕолордоохпут. Хас да группабытын сүтэрэр чинчилээхпит. Нам сэлиэнньэтигэр 11 уһуйааммытыттан ирдэбилгэ эппиэттэһэр 3 уһуйааннаахпыт. Үөрэх министерствотыгар хаста да сырыттыбыт, элбэх кэпсэтиилэри ыыта сылдьабыт. Бу оптимизация улууспутугар этэҥҥэ ааһара буоллар диэн баҕа санаалаахпыт.
Н.Захаров, Хамаҕатта нэһилиэгин олохтооҕо:
Олохтоох бэйэни салайыныы уонна Конституцияҕа уларытыылар туһунан билэ-көрө сатыыбын. Үөрэхтээһиҥҥэ тохтуохпун баҕарабын. Биһиги конституциябытыгар оҕолор 9-с кылаас кэнниттэн атын үөрэххэ атын үөрэххэ барыахтарын сөп диэн. Маннык түгэҥҥэ ханнык баҕарар оскуолаттан оҕолор 9-с кылаас кэнниттэн бараллара элбиэн сөп. Оччоҕуна нэһилиэктэргэ 9,10,11 кылаастарга үөрэнэр оҕолор ахсааннара аҕыйыан сөп. Үөрэнэр оҕо ахсаана аҕыйаатаҕына, учууталларга үп-харчы өттүнэн ыарахаттардаах буолуон сөп. Маннык балаһыанньа оскуолалар сабыллыыларыгар тиэрдиэн сөп. Онон бу уларытыыны киллэриини утарабын.
Олохтоох бэйэни салайыныыга баһылыктары талыыга норуот быыбардаабат буолла. Норуот быраабын быһыы курдук көрөбүн. Норуот бэйэтин салалтатын быыбардыахтаах.
Конституцияҕа уларытыылары тоҕо үрдүкү салалтаттан референдумунан быһаарбата ?
Конституцияҕа уларыйыылар барыта норуот этиитинэн киириэхтээхтэр.
