Бу сыл кулун тутарыттан Е.М. Шапошников аатынан Хамаҕатта орто оскуолатын директорынан 25 сыл стажтаах, уопуттаах история, обществознание учуутала Константин Шелковников ананан үлэтин саҕалаабыта:
“Ааспыт үөрэх дьылыгар уон үөрэнээччи аттестат ылан олох киэҥ аартыгар үктэннилэр. Биир үрүҥ көмүс медалистаахпыт. 100 % үөрэххэ киирдилэр: икки оҕо үрдүк, уоннааҕылар орто үөрэх кыһаларыгар үөрэниэхтэрэ. Быйылгы үөрэх дьылыгар оскуолабыт 300-чэкэ оҕоҕо аанын тэлэччи арыйыа. 21 оҕо аан маҥнайгытын оскуола боруогун атыллыахтара. 9-с кылааска 34, 11 кылааска 16 оҕо үөрэниэхтэрэ. Быйылгы үөрэх дьылыгар саҥа математика учуутала Местникова Уйгулаана Григорьевна үлэлээн саҕалыаҕа.
Спорду өрө тутар, өйүүр оскуола буолабыт. Улуустан, республикаттан спортсмен оҕолор интернакка олорон үөрэнэллэр. “Олимпик” спорт оскуолатын базата Хамаҕаттаҕа баар, маны таһынан, П.П. Юмшанов аатынан спорт оскуолатыттан тренердэр нэһилиэкпитигэр кэлэн үлэлииллэр. Оҕолор чэпчэки атлетиканан, тустуунан, волейболунан, гиирэнэн, кик-боксанан дьарыктаналлар. Интернаппыт оскуолаҕа сыста турар буолан үөрэнээччилэрбит олороллоругар олус табыгастаах. Оскуола остолобуойугар аһыыллар, усулуобуйа барыта баар»
Хамаҕатта орто оскуолата – улууспут баай историялаах, кырдьаҕас оскуолаларыттан биирдэстэрэ буолар. Бу оскуолаттан Егор Михайлович Ларионов, Эрнст Борисович Березкин, Михаил Петрович Неустроев уонна да атын үтүөлээх дьон үөрэнэн тахсыбыттара. Кинилэр ситиһиилэрэ күн бүгүн нэһилиэк олохтоохторун, үүнэр көлүөнэни саҥа кыайыыларга сирдииллэр. Үөрэнээччилэр үөрэххэ, спортка ситиһиилэрэ элбэҕэ ону туоһулуур.
Е.М. Шапошников аатынан Хамаҕатта орто оскуолата 2022 сыллаахха киэҥ-куоҥ, сырдык, аныгылыы моһуоннаах саҥа дьиэҕэ киирбитэ. Саҥа оскуола икки этээстээх, үс туспа блоктан турар: үөрэнэр дьиэлэр, спортивнай саала, 50 миэстэлээх интернат. Билии кыһата дойдубут Президенэ Владимир Путин көҕүлээбит «Үөрэҕирии» нацбырайыак көмөтүнэн тутуллубута. Онон 2023 сыллаахха оскуола 90 сыллаах үбүлүөйүн саҥа, сылаас билии кыһатыгар бэлиэтээбиттэрэ.
Дьоһуннаах үөрэх эйгэтэ баар буолбутуттан киһи үөрэр. Оскуолаҕа оҕо дэгиттэр сайдарыгар туох барыта баар – аныгы технологиянан үөрэтэр киэҥ-куоҥ кылаастар, спорт саалата, библиотека, «Точка роста» цифровой уонна гуманитарнай профиль үөрэҕин киинэ уо.д.а.
Дарина Константинова