Авксентьев Василий Иннокентьевич Нам улууһун Хамаҕатта нэһилиэгэр 1904 сыл кулун тутар 4 күнүгэр төрөөбүтэ. Чугас дьоно ахталларынан, кини Дьокуускайга учуутал семинариятыгар үөрэнэн баран Партизан оскуолатыгар сэбиэдиссэйинэн анаммыт. 1934с. Иркутскайдааҕы пединститут 3 курсун бүтэрэн баран, салгыы үөрэнэр кыаҕа суох буолан, төннөн кэлэн Наркомпроска 2 сыл, Чурапчытааҕы педучилищеҕа директорынан 1939 с. диэри үлэлээбит. Ити сыл дойдутугар Намҥа көһөн кэлэн Партизан оскуолатыгар бастаан учууталынан, онтон завуһунан үлэлээбит.
1941 с. атырдьах ыйыгар Нам оскуолатыгар нуучча тылын учууталынан анаммыт.
Улуустааҕы архыып докумуона көрдөрөрүнэн, 1942 с. бэс ыйын 26 күнүгэр сэриигэ барар (ф-1,о-1, д-7). Челябинскайга байыаннай бэлэмнэниини ааһар. Сталинград туһаайыытынан фроҥҥа сылдьыбыт, сураҕа суох сүппүт диэн бэрт кэмчи сибидиэнньэ ахтыыларга баар. Ханна өлбүтэ, хараллыбыта күн бүгүнүгэр диэри чуолкайа биллибэт.
Ити докумуоҥҥа суруллубутунан, дьиэ кэргэнигэр кэргэнэ 35 саастаах Вера Николаевна, оҕолоро Иннокентий — 1, Людмила — 2, Клара — 3, Виктор — 12, Ольга-16 саастаах, дядята Иван Михайлович -73, ийэтэ Екатерина Дорофеевна -73, кэргэнин ийэтэ Атласова Варвара Михайловна -73 саастаах дьон иитимньитэ суох хаалбыттарынан көмө ылар испиэһэккэ киирбиттэр.
Кэлин оҕолоро Ольга Васильевна нуучча тылын, литературатын учуутала, Виктор Васильевич Тимирязевскай академияны бүтэрэн учуонай-агроном, Иннокентий Васильевич техническэй наука кандидата, Людмила Васильевна тыа хаһаайыстыбатын наукаларын доктора (Германияҕа олохсуйбута) буолбуттара.
Эйэлээх олох туһугар олохторун толук уурбуттартан биирдэстэрэ Авксентьев Василий Иннокентьевич сырдык аата Хамаҕатта пааматынньыгар, ,,Ленин» холкуос кыайыыга кылаата» нэһилиэк кинигэтигэр үйэтитиллэн киирэ сылдьар.
Хаартыскаҕа: Авксентьев Василий Иннокентьевич үөһээ эрээккэ хаҥастан уҥа бүтэһик турар. Нам улууһун активистарын кытта М.К. Аммосов көрсүһүүтэ
Мария Винокурова