Төрөөбүт тыл уонна сурук-бичик күнүгэр Нам сэлиэнньэтин уһуйааннарыгар, оскуолаларыгар сахалыы тыыннаах тэрээһиннэр буолаллар. Кэлэр көлүөнэҕэ өбүгэ олоҕун-дьаһаҕын, сиэрин-туомун, үгэстэрин билиһиннэрэр сырдатыы үлэтэ үксүүр.
“Сулусчаан” уһуйаан иитиллээччилэрэ саха оҕолоро буолалларын көрдөрөллөр: нэдиэлэ устата саха үгэстэрин кытта билсии, саха аһылыгын амтанын иҥэринии, саха таҥаһын таҥныы. Төрөөбүт тыл күннэрэ буола туралларын чэрчитинэн, оҕолор, төрөппүттэр, иитээччилэр “Сахалыы саҥарыах” күрэххэ үгэ, чабырҕах аахпыттар.
Намнааҕы 2-с нүөмэрдээх оскуола 6 «а» кылааһын уолаттара
Оттон Намнааҕы 2-с нүөмэрдээх оскуола үөрэнээччилэрэ олунньу 13 күнүгэр төрөөбүт тылынан хоһоон ааҕыы күрэҕэр кытталлар. 2-с “б” кылаас уолаттара Дина Николаева-Алаас Кыыһа “Сахам тыла” хоһоонун дьоҥҥо ылыннарыылаахтык ааҕаннар бэйэлэрин бөлөхтөрүгэр муҥутуур кыайыылаахтарынан ааттаннылар. Түөрт уол хоһоон бүтэһик тылларыгар эрэнэрдии этэрин курдук “Тылбыт баарын тухары Саха сүппэт дьылҕалаах, Саха самныбат саргылаах” буоллун.
Биллэн турар, оскуолаҕа алын кылаастартан саҕалаан бука бары сахалыы таҥнан-симэнэн кэлэллэр. Кэккэ сылларга уһуйааннарга, оскуолаларга эрэ буолбакка, сахалыы таҥас кэтэри тэрилтэ үлэһиттэрэ өрө туттулар. Санаттахха, Нам улууһугар уопсастыбаннай сирдэргэ аан маҥнайгынан сахалыы таҥаһы кэппит киһинэн буолар – П.П. Ядрихинскай-Бэдьээлэ аатынан Намнааҕы “Олоҥхо” дьиэтин дириэктэрэ Вера Колпашникова.
Харысхан Попов