Партизан нэһилиэгэр олунньу 12-13 күннэригэр төрүт тыл, сурук—бичик күнүнэн элбэх тэрээһиннэр буоллулар. Саха чулуута, политическай, государственнай деятель И.Е. Винокуров төрөөбүтэ 130 сылынан, төрүт тыл уонна сурук-бичик күнүгэр аналлаах «Үтүө киһи, киһини кэрэхсэтэр» диэн тэрээһин ыытылынна.
Оҕолорго Илья Егорович олоҕуттан, кини дьоҥҥо үтүө холобурдарыттан быһа тардан сэһэргээтибит. Хартыыналарынан көрдөрөн И.Е. Винокуров аатынан түмэл туһунан билиһиннэрдибит. Ону таһынан оҕо өйүгэр хатыырын курдук, кэпсээбиппититтэн викторина ыыттыбыт. Викторинабытыгар үс миэстэни таһаардыбыт. Манна 1 м. — Саяна Сидорова, 2 м. — Уйгулаана Соловьева, 3 м. — Вова Романов буоллулар. Оҕолорго сертификат уонна минньигэс бэлэх туттарылынна.
Олунньу 13 чыыһылатыгар С.А. Новгородов төрөөбүт күнүгэр анаан Төрүт тыл уонна сурук-бичик күнүнэн биллэриллибитэ. Биһиги Саха норуота төрүт дорҕооммутунан саҥаран, кэпсэтэрбит бу инники ыччаппытыгар норуот буолалларыгар күүс-көмө буоларын билинэбит. Саха тыла — биһиги баайбыт. Баай ис хоһоонноох, Саха мындыр — тыла буолар. Бу күн биһиги оҕолорго, төрөөбүт тылынан доргуччу хоһоон ааҕыыга күрэх ыыттыбыт. Ону таһынан, суруйааччылар хоһооннорун ааҕан, туох туһунан суруллубутун, оҕолор таайа оонньоотулар. Тэрээһин түмүгэр оҕолорго минньигэс сэмэй бэлэх туттардыбыт.
С.Н. Стручков аатынан «Албан Аат» түмэлигэр Сардана Харысхал тэрийбит тэрээһиннэригэр оҕолор көхтөөхтүк кытыннылар, өссө дьиэлэригэр сорудахтаах бардылар.
***
Үгэс быһыытынан оскуолаҕа саха тылын нэдиэлэтэ ыытылынна. Ааспыт нэдиэлэ бастакы күнүгэр квест-оонньуу, төрүт тыл уонна сурук-бичик күнүгэр, олунньу 13 күнүгэр, аналлаах линейка буолла. Сахалыы суругу-бичиги айбыт А.С. Новгородов туһунан 10 кылаас үөрэнээччитэ Сандара Никонова, 11 кылаас уолаттара хоһоон аахтылар, иккис чааһыгар оһуохайынан түмүктээтилэр. Бэһис кылаастарга саха тылын уонна литературатын учуутала Екатерина Новгородова аһаҕас уруок ыытта. Сарсыарда сылаас алаадьылаах уонна алгыһынан көрүстүлэр.
***
Төрөөбүт төрүт тыл уонна сурук-бичик күнүгэр анаан нэһилиэкпит түөлбэлэрин икки ардыларыгар «Хомус» фольклор дьиэтин үлэһиттэрэ 3 түһүмэхтээх викторина ыыттылар. Түмүгэр 1-кы миэстэни «Муоҕан» түөлбэ (сал. Татьяна Афанасьева) уонна «Бэттиэмэ» (сал. Диана Парникова), 2-с миэстэни «Эрэл» түөлбэ (сал. Елена Гуляева), 3-с миэстэни «Чаран» түөлбэ (сал. Сыралыма Азарова) ыллылар. Вера
Петрова салайааччылаах «Кустук» уһуйаан итиллээччилэригэр араас онньуулары, тэрээһиннэри ыыттылар.
***
Сахалыы диктант хас да площадканан тэриллэн ыытылынна. Ол курдук «Хомус» ФДь салайааччы Семён Алексеев, оскуола директора Надежда Аммосова, библиотека салайааччыта Ия Степанова тэрийиилэринэн бу икки күҥҥэ сахабыт төрүт тылын тула элбэх тэрээһини ыытаннар астынныбыт, билиибит да хаҥаата. Үөрэх — бараммат баай диэн маны этэн эрдэхтэрэ.
Полина Скрябина, Партизан