Нам улууһугар СӨ Үөрэҕин уонна билимин министиэристибэтэ, Өрөспүүбүлүкэтээҕи «Ийэ тыл кэскилэ» уопсастыбаннай тэрилтэ, «Нам улууһа» МТ дьаһалтата көҕүлээһиннэринэн, өрөспүүбүлүкэтээҕи «Дьиэ кэргэн – ийэ тыл биһигэ» төрөппүт III сугулаанын түмүктүүр түһүмэҕинэн «Үтүө холобуру көрүү» буолла.
Төрөппүт кэмитиэттэрин оҕону сахалыы саҥатын сайыннарыы, сахалыы иитии сонун, оҕолорго кэрэхсэбиллээх ньымаларынан «Үтүө холобуру көрүү» диэн уопут атастаһыытыгар Үөһээ Бүлүүттэн, Мэҥэ Хаҥаластан, Кэбээйиттэн, Намтан кыттыыны ылан кэрэхсэттилэр.
Сугулаан кыттааччыта, элбэх сиэн эбэтэ Вера Колпашникова биһигини кытары санаатын үллэһиннэ, төрөппүттэргэ сүбэтин тириэрдэр:
— Оҕолору киэһэ 21 чаастан телефоннарын көрөллөрүн бобуохха;
— Төрөппүттэр оҕо көрөрүгэр телефоҥҥа арылдьыйары тохтотун;
— Кэпсэтии эйгэтэ суох буолуутуттан оҕолор сатаан саҥарбат, санааларын толору этиммэт буоллулар;
— Дьиэ иһигэр, уһуйааҥҥа, оскуолаҕа нэдиэлэҕэ хайаан да 1 күҥҥэ сахалыы эйгэни тэрийиэххэ;
— Уһуйааннарга, оскуолаларга хомус күнүн анаан дьарыктыахха. Хомуска оонньуур оҕо саҥата чуолкай буолар;
— Төрүт саха аһынан аһатарга нэдиэлэҕэ биир күнү аныахха.
Бүгүҥҥү тэрээһиҥҥэ Чурапчыттан, Тааттаттан, Уус Алдантан, Хаҥаластан, Амматтан, Кэбээйиттэн, Мэҥэ Хаҥаластан, Үөһээ Бүлүүттэн, Дьокуускайтан, Намтан – уопсайа 320 саха тылын тарҕата, ийэ тылы иҥэринэ сылдьааччылар, туруулаһааччылар кыттан, үөрэх, иитии эйгэтин үлэһиттэригэр, төрөппүттэргэ туһалаах үгүс сүбэ-ама биэрдилэр.
Семен Аргунов
Видео: Роман Шапошников