Нам улууһун Е.П. Сивцев аатынан 2-с Хомустаах орто оскуолата бу сайын дьулуурдаах үлэтинэн уонна улахан ситиһиитинэн үөрдэр. Оскуолабыт оҕолору үлэҕэ-хамнаска уһуйар, айымньылаах толкуйга үөрэтэр, эйгэбитин тупсарыыга күүскэ үлэлэһэр.
Ол курдук, от ыйын 1 күнүттэн 21 күнүгэр диэри 2-сХомустаах агрооскуолатын 30 оҕото «Үнүгэс» үлэ лааҕырыгар күүскэ үлэлээтэ. Лааҕыр чэрчитинэн оҕолор оҕуруот, үүнээйи көрүүтүгэр, оскуола тиэргэнин тупсарыыга, тэлгэһэ отун оттооһуҥҥа быһаччы кыттан, тыа хаһаайыстыбатын үлэтин кытта билсэн, барыта хас да биллэҕи иҥэриннилэр.
Үс нэдиэлэ устата эдэр көлүөнэ эбии билиини ылбытыттан ураты, күҥҥэ үстэ минньигэстик аһаан, чэгиэн туруктаахтык сырытта. Оҕолору эрчийэр, үлэҕэ бэриниилээх буоларга иитэр, айылҕаҕа харыстабыллаахтык сыһыаннаһарга уһуйар улахан суолталаах тэрээһин буолла. Оҕолор бэйэлэрин үлэлэрин түмүгүн илэ көрөн үөрдүлэр-көттүлэр.
Маны таһынан, оскуолабыт дойду үрдүнэн үөрэх тэрилтэлэригэр «Фонд Тимченко» сайдыы хайысхатынан ыытыллыбыт «Среда возможностей-2026» диэн бырайыактар күрэхтэригэр кыайыыны ситистэ. Бу күрэххэ барыта 978 бырайыак кыттыыны ылла. 10-с кылаас үөрэнээччилэрин хамаандата «Мультимедийный центр «Ситим» (Точка вместе»)» оскуола актовай саалатын тупсарарга суоттаан-учуоттаан бырайыак оҥордулар.
Бу бырайыак өйөбүл ылан олоххо киирэр буолбутуттан оскуола оҕолоро, үлэһиттэрэ, төрөппүттэрэ үөрүүбүт муҥура суох. Саҥа мультимедийнай киин оскуола олоҕун өссө даҕаны саҥардыа, оҕолор сайдалларыгар саҥа кыахтары арыйыаҕа диэн эрэнэбит.
Надежда Копырина,
2-с Хомустаах орто оскуолатын директоры иитэр үлэҕэ солбуйааччы