Хамаҕаттаҕа «Лингва» лааҕыр базатыгар «Силис» этнокультурнай хайысхалаах олоҥхо алыптаах дириҥ эйгэтин арыйар сезон быйыл иккис төгүлүн бэс ыйын 10 күнүгэр арыллан үлэтин саҕалаабыта.
Лааҕырга улуус оҕолоро бэс ыйын 23 күнүгэр диэри хоно сылдьан айылҕа бүччүм муннугар сынньаныахтара, төрүт культураларын тыыныгар иитиллиэхтэрэ.
«Олоҥхо төрдө» дьарыкка Юрчана Юрьевна Парникова улуу олоҥхо төрдүн-ууһун үөрэтэр. «Олоҥхо-Арт»хайысхаҕа олоҥхо эйгэтин дьүһүйүүгэ Мария Николаевна Алексеева уһуйар. Мини-театрга олоҥхону сценаҕа туруорарга, оонньуурга Надежда Борисовна Артемьева, олоҥхо матырыйаалынан сайт оҥорорго Юрий Валерьевич Андреев дьарыктыыллар.
Ону таһынан, оҕолор фольклор араас көрүҥүн баһылыы, сатабылларын сайыннара үөрэнэллэригэр «Түһүлгэ» НАК кытта ситимнээхтик үлэлэһэллэр.
В.П. Артамонов аатынан саха-француз лицей директора Ю.Ю. Парникова:
— Быйыл лааҕырбытын халаан уутун кэнниттэн оҕолор, үлэһиттэр бэйэбит күүспүтүнэн чөлүгэр түһэрдибит. Баһаартан сэрэхтээх буолуу ирдэбилинэн, икки дьиэни көһөрүү буолла. Манна сүрүн күүспүт – эр дьоммут, онно эбии олохтоох дьаһалта, төрөппүттэр өйөбүл-көмө буоллулар. Лааҕырбыт начальнигынан Надежда Борисовна Артемьева ананан үлэлии сылдьар. Лааҕыры үбүлээһин олох кырыымчык. 30 эрэ оҕоҕо харчы көрүллүбүтэ. Лааҕырбыт быйылгы сезона ичигэс күннэрдээх,интэриэһинэй тэрээһиннэрдээх, чаҕылхай түгэннэрдээх буоллун!
Мария Винокурова