Ил Түмэн XX пленарнай мунньаҕар депутаттар сир учаастагын босхо ылар бырааптаах гражданнар испииһэктэрин кэҥэтэр сокуону бүтэһиктээх ааҕыыга ылыннылар. Аны маннык быраап СВО-ҕа өлбүт байыас бииргэ төрөөбүт быраатыгар, эбэтэр эдьиийигэр эмиэ көрүллэр – олохтоммут уочараты тутуһан. Ону таһынан, байыаннай дьайыыга кыттыбыт СӨ ИДЬМ үлэһиттэрэ Росгвардия үлэһиттэрин кытта тэҥнээн, сир ылар бырааптаныахтара.
Ил Түмэн пресс-сулууспата иһитиннэрбитинэн, сокуон бырайыага бэлэм буолбут.
Бастатан туран, сир учаастагын босхо ылар бырааптаах СВО-ҕа өлбүт байыастар дьиэ кэргэттэрин чилиэннэрэ кэҥиэхтэрэ. Билиҥҥи туругунан испииһэккэ — кэргэттэр, төрөппүттэр уонна оҕолор эрэ бааллар. Ол гынан баран, практика көрдөрөрүнэн, бииргэ төрөөбүт убайдар уонна эдьиийдэр бааллар, чуолаан, кинилэр байыаһы кытта биир дьиэҕэ олорбут уонна атын чугас аймахтара суох буоллахтарына. Сокуон бырайыагынан дьиэ кэргэн чугас чилиэннэрин инники күөҥҥэ хаалларан, бырааттары уонна эдьиийдэри уочарат бүтүүтүгэр эбиэххэ диэн этии киллэриллэр.
Иккиһинэн, быһаарыы сурукка олоҕуран, билигин байыаннай дьайыы 19 кыттыылааҕын сайабылыанньатын көрүү биллибэт болдьоххо уһаабыт. Сокуонунан аккаастанар сатаммат эрээри, быһаарыыны ылынар эмиэ табыллыбат. Итинэн сибээстээн, уураах ылыллыар диэри көрүү болдьоҕун уһатыы механизма киллэриллэр, ол гынан баран үстэ 30 үлэ күнүттэн элбэҕэ суох. Бу — процедураны муҥура суох уһаппакка, сокуоннай төрүөтэ суох аккаастаммат кыаҕы биэрэр.
Маны тэҥэ, росгвардеецтар сир ылар бырааптаахтар, оттон ИДьМ үлэһиттэригэр маннык быраап суох. ИДьМ үлэһиттэрэ эмиэ росгвардеецтар курдук байыаннай дьайыы бэтэрээннэрэ уонна эмиэ ол байыаннай соруктары толороллор. Онтон сылтаан 24 киһиэхэ аккаас кэлбит. Байыас ханнык ведомствоҕа үлэлиирэ бойобуой дьайыыларга тус кыттыытын иһин өйөбүл дьаһалын хааччахтыа суохтаах. Сокуон барыла кинилэр бырааптарын тэҥниир.
Бэйэ информ.
Хаартыска: Улусмедиа