Граф Биэрэгин «Ромашка» оҕо уһуйааныгар, сэбиэдиссэй Туйара Борисовна Матвеева, алтынньы 28 күнүгэр «Книжный дом» саҥа бырайыак олоххо киирдэ.
Бу бырайыак сүрүн ааптардара педагог-психолог Сардана Аполлоновна Гаврильева уонна уһуйаан иитээччилэрэ буолаллар. Аһаҕас халлаан анныгар уһуйаан олбуоругар төрөппүт, оҕо уонна иитээччи төрөөбүт дойдуну таптыырга, кини культуратын, төрүт үгэһин билиигэ-көрүүгэ олоҕурбут сүрүн сыаллаах бырайыак буолар.
Күннээҕи түбүккэ, үлэлии сылдьар төрөппүттэр уһуйааҥҥа кэллэхтэринэ, оҕолорун кытары «Книжный дом» библиотекатын таһыгар тохтоон ааһан, Саха сирин кэрэ сирдэрин, остуоруйалары, кэпсээннэрин көрөн, ааҕан ааһыахтара.
Библиотека туруоруутугар, киэргэтиитигэр уонна төрөппүттэргэ, оҕолорго тиэрдиигэ хас биирдии уһуйаан үлэһитэ ис дууһатын ууран туран кыһалынна. Библиотека сүрүн сыала — ким баҕар сөбүлээбит кинигэтин дьиэтигэр илдьэ баран дьиэ кэргэнин кытары ааҕан, төттөрү миэстэтигэр аҕалан уурар, атын кинигэни эмиэ аҕалан хаалларыан сөп.
Бу курдук «Ромашка» оҕо уһуйаана хас биирдии оҕоҕо, төрөппүккэ болҕомто ууран үлэлиир, кырачаан иитиллээччилэргэ дьоллоох оҕо саастарыгар умнуллубат түгэннэри бэлэхтиир.
Надежда Сивцева