В.П. Артамонов аатынан саха-француз лицей 30 сыллаах үөрүүлээх, өрөгөйдөөх үбүлүөйүн иитинэн, алтынньы 28 күнүгэр, саҥа саха балаҕанын аһыллыыта биир бэлиэ түгэнинэн буолла.
Балаҕан тутуутун идеята лицей попечителэ “Обжектив Монд” международнай гуманитарнай фонд Президенэ Франсин Обри өссө 2022 сыллаахха үбүнэн көмөлөспүтэ төһүү күүс буолбут. Балаҕан тутуутугар оскуола выпускнига, предприниматель, “Айар-кут Голливуд” оҕо лааҕырын салайааччыта Матрена Винокурова, лицей үлэһиттэрэ Алексей, Алена Аммосовтар, Розалия Новгородова салайааччылаах төрөппүт комитета, төрөппүт Арсен Дорофеев, нэһилиэк “Кэрэ умсулҕана” иистэнньэҥнэрин түмсүүтэ спонсордаан өйөөбүттэр.
Төрөппүттэр бэлэхтээбит төгүрүк остуоллара, талах олоппосторо бастакы малларынан буолбуттар. Сайын устата лицей үлэһиттэрэ Василий Канаев, Анатолий Татаринов, Альберт Соловьев, Айаал Сунтаров, Иван Иванов, Алтан Саввинов, Андрей Кельциев, Кузьма Суздалов, Андрей Иванов, Николай Находкин, Николай Протопопов Александр Касьянов маастардаах тутан, турунан туран дьоһун кылааттарын киллэрбиттэрин дириэктэр Юрчана Парникова бэлиэтээн эттэ уонна махтал суруктары туттарда.
Нэһилиэк баһылыга Евгений Ушницкай Хамаҕатта тэрилтэлэригэр үһүс балаҕан баар буолбутун үөрэн иһитиннэрдэ, өбүгэни кытта ситимнээтин, сахалыы өйү-санааны олохсуттун диэн баҕа санаатын биллэрдэ. Үөрүүлээх тэрээһиҥҥэ Дьокуускайтан үгүс ыалдьыттар кэлбиттэр, кинилэр ааттарыттан Нам түмсүүттэн лицей мецената Гаврил Местников саха балаҕана, көмүлүөк сылааһа саха киһитигэр күндүтүн өйдүүллэригэр, сахалыы ырыа-тойук, сиэр-туом ыытылла турарыгар баҕарда.
Нэһилиэккэ баар Д.Д. Новгородов аатынан “Кэскил” балаҕан салайааччыта Ольга Новгородова лицейи кытта сибээстээх үлэ өрдөөҕүттэн барарын сырдатан туран сэмэй бэлэҕин туттарда. Маны тэҥэ лицейгэ үлэлээн ааспыт Матрена Соловьева, Людмила Протопопова эҕэрдэлэрин анаатылар. Мустубут ыалдьыттары Амелия Рязанская ырыанан, Анжелика Сунтарова олоҥхолоон эҕэрдэлээтилэр. Технология учуутала Алена Аммосова дьарыктыыр кыргыттара сахалыы кыбытыктаах ньыманан тикпит олбохторун бэлэхтээтилэр.
Саха балаҕана үөрүүлээхтик аһыллар сиэрин-туомун лицей үлэһиттэрэ: саха тылын уонна литертуратын учуутала Василий Сивцев кэргэнинээн библиотекарь Надежда Местниковалыын ис киирбэхтик салайан ыыттылар, кыһыл лиэнтэни баһылык Евгений Ушницкай, дириэктэр Юрчана Парникова, тутааччы-маастар Александр Касьянов быстылар. Лицей Далбар хотуттара сылаас алаадьынан, минньигэс быырпаҕынан күндүлээтилэр. Ити курдук, бар дьон үтүө санаатынан үтүө дьыала олоххо киирдэ.
Мария Винокурова