Балаҕан ыйын 12 күнүгэр Партизаҥҥа штурмовой рота хамандыыра Александр Семенов «Парус» сырдык кэриэһигэр спортивнай-патриотическай сүүрүү буолуоҕа.
Сүүрүүнү таптааччылары 3 дистанция күүтэр. Ол курдук, саҥа саҕалааччыларга 5 км., хаалыктаах хаамааччыларга 2,5 км. уонна бэлэмнээх сүүрээччилэргэ 10 км.
Трассаҕа анал бэлиэлэр туруоруллуохтара, маршрут устатын тухары медицинскэй сулууспа арыаллыаҕа. Хас биирдии фиништээбит сүүрүүк өйдөбүнньүк мэтээл ылыаҕа.
Тэрийээччилэр кыттааччыларга эбии биһирэбил бириистэри бэлэмнээбиттэр. Регистрацияламмыт спортсменнар ураты туспа футболкалары, оттон фиништээбиттэр ортолоругар сыаналаах бириистэр оонньонуохтара. Сүүрүү кылаабынай супер бириистэринэн кулунчук уонна ньирэй буолуохтара.
«Сүүрүү спортивнай эрэ буолбакка, патриотическай ис хоһоонноох ыытыллар. Эдэр сааһыгар олоҕо быстыбыт байыас, дьоруой сырдык кэриэһин үйэтитэр, кини аата-суола кэлэр көлүөнэни саҥа кыайыыларга, саҕалааһыннарга сирдиирин туһуттан ыытыллар», — диэн тэрийээччилэр иһитиннэрэллэр.
Кыттааччылар бу сигэнэн киирэн регистрацияланыахтарын сөп: https://reg.place/events/parusrun
Бэйэ информ.