Аппааныга түргэнник оҥоһуллар конструкция ньыматынан аныгылыы тутуулаах почта сибээһин отделениета туруоруллуоҕа. 2026 сылга биһигини тэҥэ, Томпо улууһун Мэҥэ-Алдан почтатын отделениета федеральнай программанан түргэнник оҥоһуллар конструкция ньыматынан саҥардыллара былааннанар.
Бу туһунан СӨ инновацияҕа, сыыппара сайдыытыгар уонна инфокоммуникация технологиятын министрэ Петр Николаев СӨ почта сибээһин федеральнай управлениетын саҥа салайааччытын Сергей Якимовы кытта оробуочай көрсүһүүтүгэр кэпсэппиттэрин sakha.gov.ru суруйда.
Маны тэҥэ, эһиилги сылга өрөспүүбүлүкэҕэ 9 отделение саҥардыллара былааннаммыт.
«Сахабыт сиригэр почта инфраструктуратын сайыннарыы уонна саҥардыы ордук суолталаахтар. Ыраах, тэйиччи сытар уонна тыа сирин пууннарыгар почта отделениелара социальнай инфраструктура биир тутаах эбийиэгинэн буолаллар. Биһиги сорукпут – аныгы сайдыылаах усулуобуйаҕа дьоҥҥо хаачыстыбаннай уонна табыгастаах өҥөлөрү хааччыйыы буолар», — диэн бэлиэтиир Петр Николаев.
Көрсүһүүгэ ураты болҕомтону почтаны тиэрдиигэ уурдулар. Өрүттэр посылка тиэрдиллиитин тупсарыыны, түргэтэтиини уонна мунньуллубатын туһунан кэпсэттилэр. Маны тэҥэ, улуустардааҕы почтовай отделениелар тиһиктэрин сайдыытын, олохтоохтор ирдэбиллэрин уонна сирдэрин уратыларын учуоттаан салгыы сайыннарар боппуруостары көрдүлэр.
«Почта оҥорор өҥөтүн хаачыстыбатын тупсарыы уонна нэһилиэнньэҕэ тиийимтиэ буолуутун ситиһии — сүрүннүүр. Бу дьон олоҕун хаачыстыбатын кытта быһаччы сибээстээх, ордук кыра уонна ыраах сытар нэһилиэнньэлээх пууннарга», — диэн бэлиэтээтэ министр.
Сергей Якимов 1998 сыллаахха Экономика уонна быраап Хабаровскайдааҕы государственнай академиятын «Финансы и кредит» идэлээх бүтэрбит, квалификациятын хаста да үрдэтиммит. Бу иннинэ кини бөдөҥ хампаанньаларга салайар дуоһунастарга үлэлээбит, 15 филиал административнай уонна коммерческай управлениеларын салайбыт.
Бэйэ информ.
Хаартыска: sakha.gov.ru