Намнааҕы 2-с №-дээх оскуола иһитиннэрбитинэн, кулун тутар 3 күнүгэр, «Россия – мин историям» историческай пааркаҕа Россия норуоттарын сомоҕолоһууларын сылын чэрчитинэн, Ржеви босхолооһун күнүгэр анаммыт форум буолан ааста.
Тэрээһиҥҥэ Намнааҕы 2-с №-дээх оскуола литературнай уус-уран куруһуогун талааннаах, дьоҕурдаах үөрэнээччилэрэ албан ааттаах Ржев куорат туһунан долгутуулаах хоһооннору аахпыттар. Кинилэр толоруулара ыалдьыттарга, дьоҥҥо барыларыгар улахан иэйиини үөскэппитин этэллэр.
Ону тэҥэ, «Полярная звезда» көрдүүр-ирдиир этэрээт үөрэнээччилэрэ «Ржев сиригэр-уотугар көстүбүт сэрии чаастарын артефактара» диэн быыстапканы тэрийэн көрдөрүүгэ туруорбуттар. Экспозиция куораты босхолуур иһин сэриилэспит буойуттар геройдуу быһыыларын уонна дойдуларыгар бэриниилээхтэрин, дьулуурдаахтарын туһунан кэпсиир уратылаахтарын бэлиэтииллэр.
«Полярная звезда» көрдүүр-ирдиир этэрээт салайааччыта Ирина Григорьева кыттыыны ылан, Ржевкэ көрдүүр, чинчийэр үлэ хайдах барбытын туһунан сырдаппыт. Сэрии сэбиргэллэрин, кырамталарын хайдах булбуттарын, чинчийбиттэрин кэпсээбит.
Оскуола үөрэнээччилэринэн, историяны үйэтитиигэ уонна норуоттар сомоҕолоһууларын өйүүргэ киллэрбит кылааттарынан, киэн тутталлар.
Семен Аргунов
Хаартыскалар Намнааҕы 2-с №-дээх оскуола VK страницатыттан