Бүгүн, кулун тутар 27 күнүгэр, Нам улууһун нэһилиэктэрин икки ардыларыгар ыытыллыбыт Улуу Кыайыы 80 сылыгар анаммыт «Ким да умнуллубат, туох да умнуллубат» уус-уран самодеятельноһын фестивалын чэрчитинэн нэһилиэктэр талба талааннаахтарын уус-уран оҥоһуктарын көрүү быыстапка үөрүүлээхтик аһылынна.
Манна саха төрүт үгэһинэн, кыбытыы тигиинэн, толоруллубут Кыайыы олбохторо, харыстыыр, хараанныыр сиэдэрэй харысхаллар, уран оҥоһуктар көрдөрүүгэ туруоруллубуттар. Илиилэрин сылааһын, сүрэхтэрин иэйиитин иҥэрбит дууһаны умсугутар, сүрэҕи үөрдэр илии үлэлэрэ.
Үөрүүлээх аһыллыыга Нам улуустааҕы култуура управлениетын салайааччыта Семен Ядрихинскай кэлиҥҥи сылларга дьон бэйэтин историятыгар, төрүт үгэһигэр интэриэһэ улаатан, уус-уран оҥоһуктары оҥоруу ураты технологиялара, сүппэт үгэстэрэ сөргүтүллэрин, элбэх үлэ ыытылларын бэлиэтээтэ. Улуу Кыайыы 80 сылыгар анаммыт сиэдэрэй оҥоһуктары айан-тутан оҥорбут дьоҥҥо махтанна, ситиһиилэри баҕарда.
Семен Прокопьевич Нам улууһугар норуот уус-уран үгэстэрин чөлүгэр түһэриигэ, культураны, прикладной искусствоны сайыннарыыга кылааттарын иһин «СӨ уус-уран оҥоһугун маастара» бочуоттаах бэлиэни Галина Рехлясоваҕа-Новгородоваҕа, үбүлүөйдээх түгэннэринэн СӨ норуотун маастардарыгар Виктор Стручковка, Анна Протопоповаҕа СӨ Ил Түмэн Бочуотунай грамотатын, Махтал суругун туттарда.
Ол кэнниттэн нэһилиэктэр туруорбут үлэлэрин дьүүллүүр сүбэ: РФ, СӨ норуотун маастара Мария Сыромятникова, СӨ уус-уран оҥоһукка маастара Галина Рехлясова-Новгородова, П.И. Сивцев аатынан Намнааҕы история, этнография түмэлин иһинэн И.Д. Винокуров-Чаҕылҕан аатынан литературнай түмэл сэбиэдиссэйэ Анна Николаева сыаналаатылар, түмүгү таһаардылар.
Бастакы бөлөххө: 1 ст. лауреат-Хатыҥ Арыы, 2 ст. лауреат-Хамаҕатта, 3 ст. лауреат-Ленскэй нэһилиэк, 1 ст. диплом-Үөдэй, 2 ст. диплом-1 Хомустаах, 3 ст. диплом-Хатырык.
Иккис бөлөххө: 1 ст. лауреат-Партизан, 2 ст. лауреат-Никольскай, 3 ст. лауреат-Көбөкөн, 1 ст. диплом-Бөтүҥ, 2 ст. диплом-Модут, 3 ст. диплом-Граф Биэрэгэ, анал аат-2 Хомустаах. Үһүс бөлөххө 1 ст. лауреат-Кыһыл Дэриэбинэ.
Бүгүҥҥү быыстапкаҕа туруоруллубут үтүө санаанан салайтаран оҥоһуллубут үлэлэр — Кыайыы олбохторо тыыл бэтэрээннэригэр, сэрии сылларын оҕолоругар, харысхаллар СВО-ҕа кыттар биир дойдулаахтарбытыгар, хорсун-хоодуот уолаттарбытыгар бэлэх быһыытынан туттарыллыахтара.
Касьян Олесов-Олук