Бүгүн Улуу киһибит — Владимир Ильич Ульянов-Ленин, төрөөбүт күнэ. Сэбиэскэй кэмҥэ бу күнү киэҥник бэлиэтиирбит: үөрэнээччилэр октябрёнокка, пионерга киирэллэрэ, күүрээннээх субуотунньуктар буолаллара. Дэриэбинэ оргуйан олороро: олбуордарга, дьиэлэргэ, массыына кузовтарыгар плакат, лозунг бөҕө суруллан ыйанара, дьон-сэргэ бары күргүөмүнэн субуотунньуктуу тахсаллара.
Аны киэһэтин кулуупка митинг, кэнсиэр тэриллэрэ. Саала тобус толору киһи буолара, ким да сылайбыта көстүбэт этэ, бары үөрэ-көтө сылдьаллара. Үчүгэй да күннэр этилэр, чахчы үчүгэй кэмнэр ааспыттар…
Төһө да кэм-кэрдии аастар, биһиги, кырдьаҕас көлүөнэ дьон Улуу сирдьиппитин Ленини умнубаппыт, сылаас, үтүө өйдөбүлү сүрэхпитигэр илдьэ сылдьабыт.
Анна Заровняева, Хамаҕатта.