Маннык үтүө ис хоһоонноох тыллары Өймөкөөн улууһун Өймөкөөн нэһилиэгин Биэрэк-Үрдэ учаастагын олохтоохторо Нам улууһун тутуу биригээдэтигэр аадырыстаан ыыппыттар.
Өймөкөөн улууһа бу сайын халаан уутуттан улаханнык эмсэҕэлээбит содулун туоратарга Саха сирэ бүттүүнэ туруммута. Нам улууһун дьоно-сэргэтэ 500-тэн тахса тыһ. солк. хомуйан ыыппыта. Тыа хаһаайыстыбатын управлениетын начальнигын солбуйааччы Юрий Петров салайааччылаах 15 киһилээх тутуу биригээдэтэ Биэрэк-Үрдэ учаастакка тиийэн дьиэлэри чөлүгэр түһэрбитэ. Өймөкөөн Биэрэк-Үрдэ учаастагын олохтоохторо биһиги биригээдэбитигэр улахан махтал тылларын ыыппыттарын, 50-ча акылаат маһын уларытан абыраабыттарын, үлэһиттэрин, көмөлөһөн стимул биэрбиттэрин, таһаарыылаахтык үчүгэйдик үлэлээн-хамсаан сэргэхсиппиттэрин ыыппыт видеоларыттан иһиттибит.
Бу нэдиэлэ саҥата тутуу биригээдэтин дьонугар Нам улууһун баһылыга Юрий Слепцов Махтал суруктары, «Ыксаллаах быһыыны-майгыны туоратыыга кылааттарын иһин» бочуоттаах бэлиэлэри туттарда. Биригээдэ дьонун тэҥэ Модут, Хатырык, Таастаах баһылыктара, улуустааҕы социальнай харалта управлениетын специалиһа Наталья Шадрина уо.д.а. махтал үтүө тылларын туттулар. Үөрэх эйгэтиттэн биригээдэҕэ 3 киһи киирэн саахалы туоратыыга үлэлээбит. Кинилэргэ управление начальнига Мария Игнатьева үөрэх үлэһиттэрин идэлээх союһа анаабыт 10 тыһ.солк. суумалаах сертификаттары туттарда. Бу курдук бэлэхтээх суруктары улуустааҕы кииннэммит библиотека, «Намкоммунтеплоэнерго», Нам 1 нүөмэрдээх оскуола, улуустааҕы социальнай харалта управлениета үлэһиттэригэр туттартаатылар.
Юрий Петров, тыа хаһаайыстыбатын управлениетын начальнигын солбуйааччыта:
“Былырыын улууспут ууга барбытыгар көмө бөҕө ылбыта. Онон хайаан да Өймөкөөҥҥө көмөлөһүөхтээхпит диэн быһаарбыппыт. Икки массыынанан тэринэн барбыппыт: биир улуус, биир Муксунов Авксентий Прокопьевич массыыналара этэ. Кини массыынатын толору заправкалаан, сапчаас ылан айаннаабыппыт. Барарбытыгар 2,5 күн айаннаабыппыт. Массыыналарбыт алдьананнар суолга оҥостубуппут. Өймөкөөҥҥө тиийэн сарсыарда 8 чаастан киэһэ 22.00 чааска диэри сэттэ күн үлэлээтибит.”
Бэйэ информ