Халаан уутуттан харыстаныы боппуруоһугар Хатырыкка улууспут баһылыга Юрий Иннокентьевич Слепцов уонна кураторбыт, улус дьаһалтатын экономикаҕа управлениетын салайааччыта Олег Владимирович Николаев кэлэн олохтоохтору кытта көрсүһэн бардылар.
Мунньах сүбэ-ама быһыытынан барда. Хаһан да халаан алдьархайыгар түбэспэтэх хатырыктар мунаахсыйаллара элбэх. Өскөтүн оҕолору, кырдьаҕастары, инбэлииттэри көһөрүү торумнаммыт эбит буоллаҕына, баай-дуол, сүөһү-ас быыһаныыта элбэх ыйытыктары үөскэтэр эбит.
Сүөһү, сылгы мыраан үрдүгэр үүрүллүөхтээх, онно анаан Быһыттаах сайылыгар хааччах оҥоһулла сылдьар. Үгүс дьон сүөһүлэрин таһааралларын ыарырҕаталлар эбит. Аны, сүөһүлэрбит былырыын көмө быһыытынан атын сирдэртэн кэлбит буоланнар, таҕыстылар да, үрүө-тараа ыһыллан хаалар кутталлаахтар диэн сэрэхэдийэллэр. Былырыыҥҥы уу мырааҥҥа дылы кэлбитин учуоттаан, үөһэ, үрдүк сиргэ таһаарар ордук буолсу диэн буолла. Араас харысхаллаах баайы-дуолу, холодильник, ларь курдуктары КСМФЦ (культурнай-спортивнай элбэх өҥөнү оҥорор саҥа киин) аҕалан ууруҥ диэн сүбэлээтилэр.
Кырдьаҕастар халаан кэмигэр санаторийга ыытаргыт буоллар диэн баҕа санааларын эттилэр. Хаарбах дьиэттэн көһөрүү программата иннэ-кэннэ биллибэккэ турара дьону хомотто. Үчүгэй да куһаҕаннаах дииллэринии, асфальт суол оҥоһуллан, хаар уута хаайтаран саас аайы элбэх дьиэ ууга барар буолла. Ол иһигэр нэһилиэнньэни аһатан олорор «Карина» маҕаһыын. Суол оҥорооччулары кытта кэпсэтии барыа диэн эрэннэрдилэр.
Билиҥҥи бириэмэҕэ хатырыктары биир санаа үүйэ-хаайа тутар, халаан уута кэлиэ дуу, кэлимиэ дуу диэн. Кэллин-кэлбэтин, таҥара сэрэҕи таптыыр дииллэринии, эрдэ бэлэмнэнэн олорорбут ордук буолуо.
Эрчим Баһыл, Хатырык