Таллан Бүрэ аатынан уулуссаттан Гаврил Эверстов аат. уулуссаҕа туоруур тимир муостаны кырааскалааһыҥҥа Екатерина Павлова көҕүлээһининэн, үлэ бүгүн, балаҕан ыйын 17 күнүгэр түмүктэннэ. Ол курдук, түөлбэ олохтоохторо муостабытыгар уопсайа үстэ төхтүрүйэн субуотунньук тэрийдибит. Кырааска Екатерина Дмитриевна уонна Михаил Михайлович Павловтар дьиэ кэргэн, Айталина Сыроватская, Татьяна Осипова көмөлөрүнэн ылылынна.
Бэлиэтээн эттэххэ, муостаны былырыын балаҕан ыйыгар Петр Сокольников баһылыктаах Ленскэй нэһилиэк олохтоох дьаһалтата тутан олохтоохтор махталларын ылбыттара. Чопчулаатахха, “Ипподром” түөлбэ олохтоохторо абыранныбыт.
Буолбут субуотунньуктарга түөлбэ уулуссаларыттан 13 киһи кытынна. Инникитин орто саастаах эдэр дьоммут үлэҕэ, субуотунньукка тахсалларыгар ыҥырабыт уонна эрэнэбит. Саамай аҕа саастаах Г. Попов аат. уулусса старостата, убаастабыллаах Решетникова Лариса Петровна сиэнинээн Сайыыналыын кэлэн үлэҕэ кыттыбыттара атыттарга холобур буолар. Парковай, Таллан Бүрэ аат., Г. Эверстов аат., Г. Попов аат. уулусса олохтоохторо көхтөөхтүк кыттыбыттарын иһин түөлбэ актива улахан махталын тиэрдэр.
Инникитин, сэлиэнньэбит олохтоохторугар туһалыыр муостабытын “Ветераннар муосталара” диэн анал ааттаан, сылын аайы ситэрэн, тупсаран иһэр былааннаахпыт.
Лариса Петровна сиэнинээн
“Ипподром” түөлбэ актива