От ыйын 1 күнэ – бойобуой дьайыылар бэтэрээннэрин күнэ.
Бу күн Нам сэлиэнньэтигэр бойобуой дьайыылар бэтэрээннэрин скверигэр митинг буолан ааста. Тэрээһиҥҥэ “Нам улууһа” МТ баһылыга Ю.И. Слепцов, “Нам улууһа” МТ депутаттарын сэбиэтин председателэ А.И. Винокуров, Нам улууһун “Буойун” общественнай түмсүү салайааччыта П.Н. Оконешников уонна байыаннай дьайыы ветераннара кыттыыны ыллылар.
Араас сылларга бойобуой дьайыыларга кыттыбыт байыастарга, кинилэр төрөппүттэригэр улуус баһылыга Юрий Слепцов, “Буойун” түмсүү председателэ Павел Оконешников, улуус байыаннай комиссара Виталий Цуканов истиҥ тыллары эттилэр.
“Нам улууһа” МТ баһылыга Ю.И. Слепцов:
“Бүгүн байыаннай дьайыылар ветераннарын күнүн бэлиэтиибит. Бу күн 2021 сыллаахха Ил Дархаммыт уурааҕынан анаммыта. Сэбиэскэй сойуус саҕаттан билиҥҥи кэмҥэ диэри элбэх байыаннай дьайыылар буолан аастылар. Бу манна барытыгар улууспут буойуттара бэйэлэрин геройдуу көрдөрөн чиэстээхтик сылдьан кэлбиттэрэ. Билигин буола турар байыаннай дьайыыга биһиги элбэх уолаттарбыт кыттыыны ыла сылдьаллар. Хомойуох иһин, элбэх байыастарбыт дойдуларын көмүскээн олохторун толук уурдулар. Кинилэр ааттарын үйэтитэргэ үлэлиир-хамсыыр биһиги ытык иэспит буолар. Бу хайысханан үлэ бара турар уонна инникитин барыаҕа. Быйыл “Буойун” тэрилтэбит тэриллибитэ 10 сыла буолар. Оҕолору патриотическай иитиигэ күүскэ үлэлээн кэллэ. Араас бойобуой дьайыыларга кыттыбыт Нам дьонун бииргэ түмэр, эйэлээх олоххо киириилэригэр күүс-көмө буолар.
Байыаннай дьайыыга сылдьар уолаттарбытыгар ис сүрэхпиттэн кыайыыны, этэҥҥэ дойдуларыгар төннөн кэлэллэригэр баҕарабын”.
Нам улууһун “Буойун” общественнай тэриллии салайааччыта Павел Оконешников:
“Ил Дархаммыт ыйааҕынан анаммыт бойобуой дьайыы кыттыылаахтарын күнүгэр сыл аайы бу сквергэ мустан, уолаттары түмэн бу тэрээһини ыытабыт. “Буойун” түмсүү быйыл тэриллибитэ 10 сыла. Ону кытта байыаннай лааҕырбыт эдэр көлүөнэни эт-хаан, өй-санаа өттүнэн иитэн, патриотическай санааны киллэрэн үлэлээбитэ 5 сыла буолла. Онон биһиэхэ үбүлүөйдээх сыл буолар. Араас патриотическай ыччаты, ветераннары кытта үлэни тохтоппоппут. Сыл аайы гуманитарнай көмө хомуйан байыаннай дьайыыга сылдьар уолаттарбытыгар, биир дойдулаахтарбытыгар күүс-көмө буолабыт. Нам улууһуттан элбэх ветеран бааллар. Хомойуох иһин, сэриигэ элбэх уолаттарбытын сүтэрдибит. Кинилэри куруук өйдүүбүт, сүгүрүйэбит. Байыаннай дьайыыга сылдьар уолаттарбытыгар этэҥҥэ кыайыылаах эргиллэн кэлэллэригэр баҕарабыт”.
“Бастакылар хамсааһыннара” бүтүн Россиятааҕы общественнай-государственнай хамсааһын олохтоох салаатын специалиһа Алексей Сыромятников иһитиннэрбитинэн, “Сүрэхпит сылааһа” акция тэрилиннэ. Акцияҕа гимназия “Талас” лааҕырын, “Берегиня” киин, “Түөлбэ” оҕо киин, “Эконам” сервиснэй этэрээт оҕолоро кытыннылар. Кинилэр байыастарга кылтан сахалыы харысхал оҥордулар, “Письмо солдату” суруйдулар, ыраастанарга кытыан оту мөһөөччүктэргэ хомуйдулар. Бу акцияны республикатааҕы психологическай киин уонна “Бастакылар хамсааһыннара” тэрийдилэр.
Митинг кыттыылаахтара бойобуой дьайыылар өйдөбүнньүк пааматынньыгар тыыннаах сибэкки дьөрбөтүн уурдулар.
М.К.Аммосов аатынан культура дыбарыаһыгар байыаннай дьайыыга олохторун толук уурбут биир дойдулаахтарбыт төрөппүттэригэр, дьиэ кэргэттэригэр уордьаннары туттарыахтара.
Дарина Константинова