Сэтинньи 22 күнүгэр Нам улууһугар З.П. Винокуров аатынан Намнааҕы оҕо искусствотын оскуолатын уруһуй кылааһын 50 сыллаах үбүлүөйэ киэҥник бэлиэтэннэ.
Сарсыардаттан И.Е. Винокуров аатынан Намнааҕы педагогическай колледжка ойуулуур-дьүһүннүүр искусство араас хайысхаларыгар маастар-кылаастар тэрилиннилэр. Ол курдук, урукку өттүгэр уруһуй кылааһын үөрэнэн бүтэрбит, билигин бу үөрэх кыһатыгар устудьуоннары уруһуйга ситиһиилээхтик үөрэтэр СӨ үөрэҕин туйгуна, СӨ методист учуутала, РФ орто анал үөрэхтээһинин бочуоттаах үлэһитэ Дария Романова “Рельефная живопись, акрил, патина”, СӨ үөрэҕин туйгуна, РФ үөрэтии, иитии бочуоттаах үлэһитэ, НПК худуоһунньуктарын сэбиэтин салайааччыта, Россия худуоһунньуктарын сойууһун чилиэнэ Сергей Колесов “Пейзаж” тиэмэлэргэ уо.д.а. билиилэрин-көрүүлэрин үллэһиннилэр. Маастар-кылаастарга сылдьыбыттар уус-уран дьүһүйүү кистэлэҥнэрин билистилэр, таһымы үрдэтэр дьарыктарга сылдьан элбэҕи биллилэр-көрдүлэр.
Күн иккис аҥарыгар оҕолору, ыччаты кэрэ эйгэҕэ уһуйуу, үөрэтии-такайыы хайысхатыгар үөрэнэр оҕолор идэҕэ туһуламмыт тиһиликтэрин тэрийиигэ санаа атастаһыыта тэрилиннэ. Төгүрүк остуолу З.П. Винокуров аатынан Намнааҕы оҕо искусствотын оскуолатын дириэктэрэ Алексей Афанасьев иилээн-саҕалаан ыытта.
Санааларын үллэһиннилэр: «Что такое современное искусство?» — Туйаара Шапошникова, АГИКИ графика, живопись кафедратын сэбиэдиссэйэ, профессор, Россия худуоһунньуктарын сойууһун чилиэнэ, СӨ искусствотын үтүөлээх деятелэ, эдэр худуоһунньуктар В.Р. Васильев аатынан өрөспүүбүлүкэтээҕи общественнай бириэмийэтин 1 лауреата, “Базовые принципы проектно-ориентированного обучения в ведущих модулях дизайн-образования” – Ариан Ермолаев, П.П. Романов аатынан Дьокуускайдааҕы художественнай колледж “Дизайн” салаатын салайааччыта, “ШКИД-D” креативнай индустрия оскуолатын уус-уран салайааччыта, Россия дизайнердарын сойууһун чилиэнэ, СӨ Ил Дарханын иһинэн култуурунай бэлиитикэҕэ сэбиэтин чилиэнэ, “Социальное партнерство «школа-колледж» при подготовке учителей изобразительного искусства” – Наталья Гуляева, И.Е. Винокуров аатынан НПК художественнай-графическай салаатын сэбиэдиссэйэ, СӨ үөрэҕин систиэмэтин туйгуна, «Профориентационная работа в современных условиях» — Светлана Макарова, Хатастааҕы оҕо искусстовтын оскуолатын үрдүк категориялаах учуутала, СӨ үөрэҕин туйгуна, «Активирующий подход в профориентации в Детской художественной школе им. Ким Л.А.» — Галина Маркова, бу оҕо искусствотын оскуолатын үөрэтэр-иитэр үлэҕэ дириэктэри солбуйааччы, уруһуй отделениетын үрдүк категориялаах учуутала, СӨ култууратын үтүөлээх үлэһитэ, ССРС култууратын туйгуна, Саха сирин худуоһунньуктарын, маастардар «Уус» сойуустарын чилиэнэ, «Современные методы преподавания на уроках керамики» — Алексей Андреев, Покровскайдааҕы оҕо искусствотын оскуолатын уруһуйга үрдүк категориялаах учуутала, СӨ үөрэҕириитин туйгуна, Россия худуоһунньуктарын сойууһун чилиэнэ, «Реализация проекта — «Рисуем все» в РС(Я)» — Александр Харитонов, Покровскайдааҕы оҕо искусствотын оскуолатын дириэктэрэ, СӨ култууратын туйгуна, СӨ култууратын үтүөлээх үлэһитэ, Анжелика Бережнева, СӨ култуураҕа, духуобунай сайдыыга министиэристибэтин геокультурнай сайдыыга институтун сүрүннүүр методиһа уо.д.а.
Төгүрүк остуол түмүгүнэн ойуулуур-дьүһүннүүр искусство эйгэтигэр уһуйуллар оскуола үөрэнээччилэрин өй-санаа, сиэр-майгы өттүнэн сайдалларыгар, култуура сыаннастарын иҥэринэллэригэр, оскуолалары, орто анал, үрдүк үөрэхтэри кытта ыкса сибээһи күүһүрдэргэ, инники өттүгэр оҕолор бу хайысханан идэлэрин сөпкө талалларыгар үлэни саҥа таһымҥа таһаарарга, үөрэх, үлэ баазатын бөҕөргөтүүгэ о.д.а. туһаайыыларга киирбит санаалар түмүллүбүт уурааҕын ылыннылар.
Үбүлүөйдээх тэрээһин биир бэлиэ түгэнинэн З.П. Винокуров аатынан Намнааҕы оҕо искусствотын оскуолатын уруһуй кылааһын араас сылларга үөрэнэн бүтэрбит оҕолорун «Наследие талантов долины Эҥсиэли» быыстапка Е.М. Шапошников аатынан хартыына галереятыгар аһыллыыта буолла. Тэрээһин кыттыылаахтара оҕолор уруһуйдарын, ол иһигэр билигин киэҥник биллэр талааннаах выпускниктарын Туйаара, Аита Шапошниковалар, Иннокентий Пестряков, Сергей Колесов, Дария Романова уо.д.а. үлэлэрин астына-дуоһуйа көрдүлэр.
Иккис бэлиэ түгэнинэн уруһуй кылааһын 50 сыллаах үлэтин сырдатар, саҥа бэчээттэнэн тахсыбыт «Дарующие радость творчества» альбому билиһиннэрии буолла. Бу альбом оскуола уруһуй кылааһын тэриллиитин, үлэтин, сайдан кэлбит историятын кэпсиир. Манна үлэлээн ааспыт педагогическай үлэ ветераннарын, ону тэҥэ оскуолаҕа үлэлии сылдьар учууталлар тустарынан матырыйааллар түмүллүбүттэр. Ону сэргэ араас сылларга үөрэммит оҕолор ахтыылара киирбит. Выпускниктар бэйэлэрин кэмнэригэр хайдах үөрэммиттэрин, айар үлэлэригэр, карьераларыгар, олохторугар үөрэппит учууталлара, оскуолалара хайдах сабыдыаллаабытын туһунан санааларын истиҥник үллэстибиттэр.
Бэлиэ күн түмүк тэрээһинигэр З.П. Винокуров аатынан Намнааҕы оҕо искусствотын оскуолатын уруһуй кылааһын үбүлүөйүнэн эҕэрдэлээтилэр: Егор Протопопов, Нам улууһун баһылыгын солбуйааччы, Анжелика Бережнева, СӨ култуураҕа уонна духуобунай сайдыыга министиэристибэтин геокультурнай сайдыыга институтун сүрүннүүр методиһа, Семен Ядрихинскай, Нам улууһун култуураҕа управлениетын салайааччыта, Егор Бочонин, Нам улуустааҕы үөрэх управлениетын начальнигын солбуйааччы уо.д.а.
Кинилэр идэлэрин толору баһылаан, искусство кэрэ эйгэтигэр айымньылаахтык үлэлиир хас биирдии учуутал киллэрэр кылаатын үрдүктүк сыаналыылларын, айар куттаах саҥа көлүөнэни иитэргэ, сайыннарарга кыһамньылаахтык, үтүө түмүктээхтик үлэлииллэрин бэлиэтээтилэр. Бастыҥ үлэлээх учууталларга Бочуотунай грамоталары, Махтал суруктары, сибэкки дьөрбөлөрүн туттардылар. Дириэктэр Алексей Афанасьев СӨ култуураҕа, духуобунай сайдыыга министиэристибэтин «За вклад в развитие образования в сфере культуры и искусства РС(Я)» бэлиэнэн наҕараадаланна.
Оскуоланы араас сылларга бүтэрбит выпускниктар ис сүрэхтэриттэн махтанан, бэйэлэрин эҕэрдэлэрин тиэртилэр, сэмэй бэлэхтэрин туттардылар.
Улууспут култууратын сайдыытыгар бэлиэ суолу хаалларан, инникитин айымньылаах үлэҕэ көҕүлүүр, саҥа көрүүлээх көлүөнэ уһуйуллан тахсар аартыгын тутуһар дьоһун суолталаах тэрээһин буолан ааста.
Касьян Олесов-Олук