Бүгүн, муус устар 3 күнүгэр, М.К. Аммосов аатынан култуура уонна духуобунай сайдыы дыбарыаһыгар Дойду үрдүнэн Норуоттар сомоҕолоһууларын, Саха Өрөспүүбүлүкэтигэр Култуура сылынан Нам улууһун сэдэх дьарыктаах «Ситим» коллекционердар түмсүүлэрэ «Ааспыт кэм ахтылҕана — Үйэтитии» быыстапка-дьаарбаҥка тэрийдилэр.
Тэрээһиҥҥэ улууспутугар үлэлии-хамсыы сылдьар «Ситим» түмсүү коллекционердара, Дьокуускайтан, Амматтан, Мэҥэ Хаҥаластан сэдэх дьарыктаах коллекционердар өр сыллаах муспут үлэлэрин түмэн, ууруна сылдьыбыт малларын, оҥоһуктарын быыстапкаҕа аҕалан туруорбуттар. Ким атыылыыр, ким атыылаһар, ким атастаһар түһүлгэтэ тэриллибит.
Нам улууһугар 2017 сыллаахха коллекционердар түмсүүлэрэ тэриллибит. Салайааччынан Людмила Петрова ананан үлэлээбит, онтон 2019 сылтан СӨ уус-уран оҥоһук маастара Мария Аманатова салайа сылдьар.
Ураты, дьикти дьарыктаахтар открвтка арааһын, шкатулкалары, чуораанчыктары, улуус хаһыаттарын, тэттик кинигэлэри, иһиттэри-хомуостары, урукку байыаннай маллары, таҥаһы-сабы, значоктары, вымпеллары, урукку афишалары, куукулалары, оонньуурдары онтон да араас эгэлгэ барыта баар. Киһи эрэ сөҕө-махтайа, хайгыы, кэрэхсии көрөр малын-салын туруордулар, — диэн улуустааҕы култуура уонна духуобунай сайдыы управлениетын специалистара бэлиэтээтилэр.
Киһини умсугутар, урукку кэмҥэ эргитэр, оҕо сааһы санатар ураты дьарыктаахтары улуус култуураҕа уонна духуобунай сайдыыга салалтатын уус-уран оҥоһугу сайыннарыыга специалиһа, СӨ култууратын туйгуна Матрена Платонова эҕэрдэ тыл эттэ, дьарыктара таһаарыылаах буоларыгар, өссө да хаҥыы турарыгар баҕарда. Ыччаттарыгар, кэнчээрилэригэр үтүө холобур буолан, историяны кэрэһэлиир үлэ салалла турарыгар баҕарда.
Биһиги, редакция үлэһиттэрэ, быыстапканы эмиэ бэккэ сэҥээрэ, сөҕө-махтайа көрдүбүт. Дьокуускайтан, атын да улуустартан биллэр-көстөр, ааттаах-суоллаах коллекционердар болҕомтоҕо ылан кытта кэлбиттэрэ кэрэхсэбиллээх.
Бастатан туран, хаһыат үлэһиттэрэ буоларбыт быһыытынан, хаһыат бөҕөтө тэлгэнэ сытарыгар тиийбиппит, биир дойдулаахпыт, бэтэрээн суоппар Егор Бугаев эбит. Улуустар хаһыаттарын мунньубутун таһынан, техникатын техосмотрун талоннарын уурунан испитин тиспит.
Иис-уус дьарыктааҕынан биллэр Марфа Оконешникова самовардары, иһити-хомуоһу, харчыны, значоктары коллекциялыырын, өссө бу сороҕото буоларын эрэ биллибит.
Намнааҕы «Ситим» түмсүү коллекционердарын бастакы салайааччыта, араас хайысхалаах коллекционер Людмила Петрова талан-талан илдьэ кэлбит быыстапкатыгар космонавтика тематыгар тохтоотубут. Муус устар 12 күнүгэр Космонавтика күнэ бэлиэтэнэр. Людмила Васильевна бастаан оскуолаҕа үлэлиир кэмигэр үөрэнээччилэригэр билиһиннэрээри көрдөрөр матырыйаал быһыытынан туттарыгар мунньубут. Онтон ыла бэйэтэ да умсугуйан салгыы коллекциятын хаҥатар.
Үрдүкү кылаас уолаттара ыксаабакка, аа-дьуо быыстапканы көрө-истэ сылдьалларыгар тохтоон кэпсэттибит.
Ураты дьарыктаах дьонноох буоламмыт, бүччүм харалла сылдьар маллар ааспыт кэмнэри кэрэһэлииллэр, өбүгэбит олохторун-дьаһахтарын билиһиннэрэллэр.
Семен Аргунов
Видео: Роман Шапошников